肥仔Ｌ與一位日本女士結婚，對日本女讚不絕口，對左丁山講：「男士結婚對象首選日本女，第二係南韓女，第三大陸女，第四先至到香港女。」記得前幾日與蔡瀾飲下午茶，蔡瀾就話結婚對象首選係南韓女，次選日本女。究竟日本女與南韓女之間，邊個最好，左丁山全無經驗，唔敢講。日韓女士好在邊處呢？據講話佢哋能夠百忍成金，隱惡揚善，唔會令男人難堪或尷尬喎。廠家成日在大陸工作，一星期不回家，妻子有此忍忍忍特質，至為緊要。
肥仔Ｌ在東莞設廠，生意甚佳，左丁山問佢：「報紙話春節過後，民工失蹤，不回廠上班，你間廠有冇遇上請工人嘅困難？」肥仔Ｌ話：「我哋以前見過晒啦。想當年，我間廠重喺大埔工業邨，喺《成報》賣廣告招聘工人，三千蚊廣告費一日，結果只有三個人上門應徵。所以我後來叫工人周圍傳開去，任何人上門應徵，都可以得一封利是一百蚊，結果反應重好。我現在每個月盯緊民工工資，隨時加薪，緊貼市場，所以冇乜工人困難。為免擴充困難而搵唔到人，我走咗去廣西設立分廠，就地請人，兩個禮拜就請到幾百工人，一啲問題都冇。」
內地工人唔憂冇工做，情況與八十年代初香港工廠尚未北移之前相同，但咁樣唔代表中國工人好有錢，佢哋只係生活比以前好好多啫，有錢嘅係一啲大戶、大款、民企老闆。肥仔Ｌ話香港廠商老闆三十年來嘗盡酸甜苦辣，賺到錢唔會到處揚，識得應慳則慳，所以俾內地人笑，一啲富有同胞對佢講：「所有中國人，包括埋台灣及你哋香港人，最豪爽嘅，最豪氣嘅就係我哋大陸人，你哋做乜鬼咁小家啫。」
以前嘅肥仔Ｌ就會立即氣頂，同對方揮過，睇吓邊個豪爽吖。今日嘅肥仔Ｌ，收晒火氣，碰上如此場面，立即自認蔽鄉，猛話對方有氣魄，有石崇之風，香港人就係小家得滯嘅！喺內地做生意，適當地示人以弱，可以襟撈啲。