上個禮拜政府拍賣三幅大埔地皮，華華曾報道第一太平戴維斯陳超國眼光最準。日前，華華翻查報章，發現原來以總成交價計，盈富物業張錦成嘅估值最接近成交價，賣地前佢喺報章刊登嘅公司廣告，就話估計總成交價超過60億，結果同政府條數61.8億好接近。華華問佢點解咁好嘢，佢話係同啲發展商傾完偈，揣摩收到啲料得出嚟嘅。
下個禮拜又有幅長洲蚊型地拍賣，價錢又會點呢？張錦成話地皮細冇指標作用，相信都係啲中小發展商或地區投資者之爭，樓面呎價應該唔過1300蚊，即比勾地價每方呎樓面873蚊高近五成。聽講張錦成噚日親自入長洲實地視察塊地皮，莫非佢都想買嚟過吓發展商癮？
[email protected]