有時返工受咗好多氣同壓力，冇途徑宣洩，最後諗住打機實食冇黐牙，點知又錯晒！點解？皆因大家玩緊嗰隻Game叫《NBAStreetHomecourt》，睇見係籃球，以為一般運動遊戲咁簡單，查實超華麗畫面背後，玩家經常要俾電腦「糟質」，例如對手嘅明顯推撞、雙手叉頸，好陰功，打唔贏之餘仲輸埋啖氣，未玩過街場嘅話仲以為暴力份屬必然，比賽變玩《街霸》，如果想以暴易暴，你話遲吓出番隻《街霸籃球》，意下如何？
記者：陳國輝
陪女友打混雙 唔讓唔得
同電腦對賽，就算茅躉王招數出盡，頂多勤練兩個星期，球技必然提升；但對手如果係你女友嘅話，你可以點先？咪話我一竹篙打一船人，曾經與不同女玩家交手，佢哋心情緊張、動作誇張就梗㗎喇，若然輸埋會幾大鑊，第一句實賴你：「做乜唔睇住我呀？」，唔好老脾嘅話，費事出聲已經抦咗你一嘢，可想像跟女朋友一齊玩，情況更嚴重。《NBAStreetHomecourt》今次仲特別追加WNBA與NBA混合玩法，同隊裏面可有男有女，玩法新鮮，擺明吸納女玩家，當然遊戲亦參照現實，無論進攻抑或防守能力，女性都比男性為弱，入波較困難；咁佢哋點樣可以贏波？唯一方法係靜靜雞讓佢，但肯定比贏波更高難度。
彈弓人玩連續技 爆你樽
𠵱家SportsGames越來越多元化，唔再係齋靠練波咁單調。好似世嘉隻《VirtualTennis》，靠贏比賽買靚球拍嘅又有，像今次《NBAStreetHomecourt》玩Combo爆樽嘅都有。點可以贏得更多Combo？查實類似打《街霸》出連續技，竅門係你必須成功扭過對手後衞，然後再跳起用唔同花式入樽，你扭過越多對手，即Combo越高，Point就會越多，但係已經講過，玩街頭籃球班友仔好茅，跑跑吓，網隊卡達會突然撞跌你，甚至乎叉你條頸，點犯規都冇人理，但有樣嘢值得一提，花式入樽有好幾種，最誇張莫過於彈弓人跳起之後仲高過塊籃板，跟住仲要打幾個觔斗先入波，超脫離現實，安東尼完全變成一個「神」，鍾唔鍾意咁玩因人而異。
安東尼加桃花眼 媾死女
講到今集同以往《NBALive》最大分別，當然係加入街場元素，唔會一味着住件波衫，或者喺室內運動場比賽，背景有時喺學校、有時喺公園，甚至出現喺貧民區都唔定，感覺相當新鮮，唯一可惜係冇晒班Fans同觀眾歡呼，場面冷清少少有啲唔慣。今集力谷巨星打街場為賣點，好似奧尼爾、高比仔、安東尼等SuperStar通通呈現眼前，最抵死係玩家仲可自行更改球員嘅數值及外貌，包括各項能力值以及眼耳口鼻五官，如果幫安東尼加對桃花眼冧女，都咪話唔搞笑！
記者試玩：好想篤佢腹肌
嘩！使唔使連皮膚上嘅汗珠都咁清楚。睇見佢一身肌肉，令小記聯想起幾年前一輯李小龍3D廣告。當時3D喺香港仲未流行，第一次睇，像真程度令小記嘩然。甚至諗：「李小龍死前拍定嘛？」今次喺《NBAStreetHomecourt》見番，感覺又返番嚟，不論肌肉細節、皮膚紋理，全部跟足真人，畫功之認真，實在令我佩服。
PROFILE
機種：PS3/XB360
廠商：EASports
類型：運動
人數：1-2人
（對應Online）
