相信好多人都知道，美國幾乎每個禮拜都會公布唔同嘅經濟數據，而呢啲數據對全球股市、債市都有舉足輕重嘅影響，如果數據比預期差，再加上大行「抹黑」，全球股債都會好似地震咁，出現大幅波動。
ericngkc喺《香港討論區》講：「雖然數據係有一定嘅參考價值，但有時覺得好似係特登做出嚟咁，任由基金同大行作為炒作嘅藉口。」韋捷聲就話：「如果冇呢啲數據，基金佬點炒上炒落賺錢。計我話，數據好時就要沽貨，數據差時就要入貨。」
信自己分析好過
dennish1都有同感，「如果數據比預期好，散戶覺得係利好消息，但大行亦可以話擔心經濟增長過急而要加息，咁大市就會跌；如果比預期差，散戶驚係利淡消息，而大行又可以話經濟增長放緩，有減息機會，大市可望會升。所以到最後，都係信番自己嘅基本分析好過。」
除咗dennish1，唔少網友都認為，經濟數據比預期好或者差，根本都係視乎大行同散戶點樣分析。HDSI話：「數據差過預期，大行可以話遲啲會好轉，叫人趁低撈貨；但又可以睇成為跌市嘅先兆，叫人沽貨，散戶都唔知點算好，惟有係靠自己小心分析。」