傳統家用掃描器，都係使用三原色即紅、綠、藍，替圖文掃描取樣，而經過多代發展，近年嘅掃描器都畀唔到用家新意，加上數碼相機大行其道，有時拎數碼相機放平文件影一張，一般用途照樣過到骨，家用掃描器仲有無存在意義呢？
HP答案就話有，從佢哋最新推出ScanjetG4050，仍然加料炮製，就知HP覺得掃描器仍然有得做！講番呢部G4050，特別之處係將取樣由傳統三原色，進化成6色及96bit色深掃描，新聞稿內一大堆技術用詞，可能會睇到人𢱑晒頭，不過只要你明白G4050喺顏色層次更廣，效果更逼真，就係呢部新機優點。另外值得一提仲有硬件除塵去刮花，唔使再用軟件慢慢執相，確實幾方便，再加埋其他除紅眼、增強黑位內容等等，的確比舊有掃描器強力！
G4050開價$1,888，問朋友會唔會買，好多都擰頭，點解呢？靚啲，真啲喎，答案係用唔着，除非須要用到好專業質素效果，否則情願買部掃描打印二合一嘅型號仲實用，而且要平好幾百蚊㖭。
記者：許福合
查詢：HP（800938833）