星期五澳華黃金（1862）首日掛牌，即日勁跌7.53%，令散戶每手蝕826元，係今年第3隻蝕錢的新股。網友kclok喺《香港討論區》話：「黃金大牛市都蝕，公司真係有問題。」Fugitive就問：「3年都冇錢賺，仲畀佢上主板，對唔讀招股書嘅人嚟講係個陷阱，點解？」
澳華黃金出師不利，有網友開始擔心就嚟招股嘅「味千拉麵」，water9394話睇見澳華黃金嘅下場，味千拉麵都係「食唔過」。bobochan2就指味千「PE咁高又難食，唔抽；冇包埋大陸味千上市，得香港店，市盈率仲30幾倍，冇內銷概念又貴。」傻散話：「𠵱家嘅時世咁亂，坐定定，攞住錢好過啦！」
味千推介會逼爆18圍
好明顯，bobochan2對味千上市詳情唔係好掌握，據初步招股文件指出，上市嘅味千擁有122間分店，當中32間喺上海、12間喺深圳、8間喺北京、51間喺國內其他地區，而香港就有19間分店。
喺《公眾投資168綜合論壇》味千都有捧場客，精英大師話自己有份去周四嘅推介會，「可能好多人都好似我咁諗以為有贈券送，所以十分多人，四季擺咗18圍都唔夠坐。贈券就無啦，拉麵就送咗盒。隻股增長得好勁，主要當然係大陸市場啦，人工、舖租平，雖然香港最平個麵賣30元，大陸賣15元，平咗50%；但香港人工約貴6倍，舖租約貴7倍，咁你話係咪大陸賣15元，好過香港賣30元。公司起步緊，放心認購。」
人之初仲實地試過味千喺國內分店嘅水平，「虎門呢間好好味，生意都OK；江門嗰間啲嘢好難食，午時嗰陣得幾張枱有食客；不過股市同呢啲嘢無必然關係。」