呢期城中最Hit嘅車話題，我諗除咗係環保車之外，都唔會再有其他更Hit嘅Topic。自從財爺喺佢公布嘅新一年財政預算案中，話會對一系列環保汽油私家車，實施最多5萬元嘅減免首次登記稅優惠後，聽聞唔少想買車嘅用家，最近都傾向揀呢類車，搞到班Sales簽單簽到手軟；此外，財爺亦提出向歐盟前期或歐盟I期嘅商用柴油車車主提供資助，等佢哋將部車換成符合歐盟IV期環保條例嘅新車，一齊為「藍天行動」打氣咁話。
成效是好是壞都仲係未知之數，不過尋找其他能源或研製新技術，似乎比起對車主提供資助會來得更迫切。以大家日常都有機會接觸嘅巴士為例，雖然各大巴士公司已為旗下車輛進行各樣環保措施，甚至加快購買新車嘅速度去取代舊車，但奈何每日喺路上行走嘅巴士數目實在太多，恐怕只會變成一個治標唔治本嘅方法。
廢氣排放減超過30%
相反，當我哋仲叫車主使用符合歐盟IV期環保條例嘅汽車時，英國已將Hybrid混能技術套用到雙層巴士；喺上星期正式投入服務嘅Hybrid混能雙層巴士，係由英國Wright車廠所製造嘅PulsarGeminiHEV，車長10.3米可接載82名乘客，而外表亦睇落同普通巴士差唔多，但機械配搭卻完全唔同，除一台符合歐盟IV期環保條例嘅柴油引擎外，仲加裝有電馬達及蓄電池，而運作原理亦同Hybrid私家車相同。雖然有關方面無講明巴士嘅性能表現如何，但表明可減少廢氣排放超過30%！既然港府成日話巴士係空氣污染嘅源頭，咁倒不如帶頭使用Hybrid巴士，畀啲壓力巴士公司，等佢哋快啲換晒啲舊車吖嘛！
記者：鄭達基