黃柏高（Paco）旗下的金牌歌手前晚在灣仔會展演出，緋聞男女方力申和鄧麗欣（Stephy）出盡法寶搶鏡，不但在台上拖手唱情歌兼拉扯互望，方力申還投入得幾乎要咀嘴。事後Stephy踢爆除了拖手外，其餘都是方力申即興演出，她也怕得想退縮，原來他們愛情三角錯成員葉念琛也在場，難道是方力申故意示威？
前晚一班金牌唱片歌手在會展演出「芝華士醇音樂會」，鄭中基打頭陣演出，側田壓軸，最受歡迎是古巨基和黃品源，方力申和鄧麗欣合唱時打情罵俏則最搶鏡。
原本跪地錫手
方力申和Stephy合唱歌曲《十分愛》時，拖手深情對望，拉拉扯扯像在調情一樣，唱至尾聲時，方力申更將Stephy拉埋身邊，臉頰越哄越埋，幾乎想親吻她一樣。事後Stephy透露緋聞男友葉念琛也在場欣賞，難道是方力申故意向葉念琛示威？方力申接受訪問說：「舞台表演啫，我同Stephy夾過㗎。本來我諗住跪地錫佢隻手，但佢條裙咁短，我跪喺前面影相唔靚呀。」問他最後何以沒錫Stephy，方力申說：「兩支咪頂住嘛。」他謂以後也不會突擊錫Stephy，以免被指非禮。至於兩人在台上拉拉扯扯，方力申說：「係令自己減壓嘅小動作，令畫面豐富啲，想睇多啲就留意電影《十分愛》啦。」他又否認在《十》片的戲份遭情敵葉念琛刪剪。
Stephy表示在台上看着方力申時有點害怕，她說：「事前係有夾拖手，不過佢越拉我越埋，我想退呀，當時感覺好深情，但我怕自己忍唔住笑呀，都驚佢真係錫落嚟，我哋只係夾咗拖手之嘛。」有指方力申可能因拍戲時與她咀上癮，Stephy說：「佢太入戲先會咁，本來跪地錫手，都費事益佢。」不過Stephy又忽然轉軚大讚說：「頭先係好冧，好有感覺，只係俾佢最後嘅動作嚇親，唔知點解佢有咁嘅反應。」問到葉念琛也有欣賞，會否尷尬，Stephy說：「又係佢，唔好講佢啦，救命。」
基仔冧女新人
方力申跟Stephy在台上纏綿，不過古巨基也有女作伴，前晚他拖着金牌新人唐素琪合唱。見對方頻說緊張，基仔即發冧功說：「你平時生活有乜緊張，可以隨時打畀我。」基仔又謂第一次見到唐素琪時，正在錄音室看車路士對曼聯球賽，眾人大叫車路士好波時，雷頌德帶唐現身，並介紹其英文名為Chelsea，基仔說：「我哋即改口話Chelsea，好歌。」
有指黃柏高今年力捧名單上沒側田，有份被點名的方力申說：「喺我心目中最紅係佢，Paco（黃柏高）講漏咗我好多年，以前我都唔開心，諗住要靠自己，𠵱家睇開咗，今晚壓軸都係側田啦。」
採訪：馬建華、王連連
攝影：陳偉權、陳順禎
