老外演員講得一口流利廣東話，除了觀眾熟識的河國榮和喬寶寶外，近日多了一位在無綫處境劇《同事三分親》中扮湯盈盈夫婿的布偉傑，他對中國文化愛到發燒，7年前放棄高薪要職，轉行當全職臨記，一圓當藝人的夢想。布偉傑日前接受訪問，更仿效特首曾蔭權競選口號，親筆撰寫一句「我要做好呢份工」，承諾把歡樂帶給觀眾。
在無綫處境劇《同事三分親》中扮演湯盈盈夫婿的外籍演員布偉傑，操得一口流利的廣東話，他95年來港教英文，逗留一年半，已對這個彈丸之地產生感情，其後他返回美國進修中國文學課程，99年下定決心做過江龍，希望可以把中文學以致用。
放棄7萬高薪
現年34歲的布偉傑表示95年在電視看過河國榮的演出，深受影響，他對演藝方面同樣有濃厚興趣：「我當時已同自己講，將來一定要做第二個河國榮。」為了這個目標，布偉傑苦學廣東話，他當時任職IT界，兼職當臨時演員一過戲癮，布偉傑說：「我都知自己係鬼佬，外形局限演某啲角色，一定冇機會做主角，我入行唔係要做明星，我係好鍾意做演員，希望將歡樂帶畀觀眾。」
布偉傑為了專注幕前演出，在2000年毅然放棄月薪達6、7萬的IT工作，決心全職做臨時演員，他說：「始終做臨時演員收入好唔穩定，我試過有一個月只係賺到5,000蚊，支付屋租後，我成個月只得2,000蚊使，生活好刻苦，要食杯麵捱麵包，不過都冇動搖我嘅決心，好彩我身邊嘅朋友好支持我，我冇錢冇工開時，佢哋成日接濟請我開飯。」
得河國榮帶路
布偉傑更表示要學特首曾蔭權競選口號一樣，並用筆即場寫下：「我要做好呢份工。」雖然有些中文字他不太記得，需要記者從旁提示，但他寫的字仍十分工整，值得一讚。
一直受河國榮影響的布偉傑可謂惺惺相惜，這次有機會參演《同》劇，他表示都是河國榮帶挈，布偉傑說：「我聽講無綫最初揀角時，首選河國榮，但係佢呢段時間忙緊搞舞台劇，所以佢同公司推薦我，佢話唔想無綫只係得佢一個鬼佬演員，公司就畀咗呢個機會我，最開心仲係無綫簽埋我做合約演員。」
布偉傑在《同》劇中，與湯盈盈扮演一對小夫妻，他說：「呢套劇播咗幾集，我出街都有巿民猛叫我角色『韋一』個名，雖然佢哋未必叫得出我真名，不過嗌得出我個角色嘅名都已經畀我好大滿足感，證明佢哋對我有印象。」
布偉傑認為自己在《同》劇中表現得60至70分，他解釋說：「我翻睇錄影帶，覺得自己表現好生硬，我會逐一改進，做到最好。」布偉傑有意演而優則導，他說：「我諗住累積10年演出經驗之後，有機會轉做幕後，一嘗當導演滋味。」
女友應記一功
提到布偉傑的廣東話進步神速，原來他的女友也應記一功，他說：「我識嘅全部係香港女朋友，佢哋同我拍拖蝕底晒，因為佢哋英文冇進步，相反我就多咗練廣東話嘅機會，𠵱家我反而唔鍾意講英文，我覺得講廣東話先可以真正表達到自己嘅感受。」
採訪：比華利
攝影：陳偉權
