時間：96年6月9日
地點：大埔
人物：陳綺明
經過：藝人唔小心走光露點大家可能見過唔少，但好似陳綺明露得咁離奇，就認真罕見。雖然佢𠵱家已經淡出娛樂圈，但96年出席電台舉行嘅《群星奧運大挑戰》活動出位露點，仍令人印象深刻。
陳綺明當日參加咗女子自由式50米初賽，以第五名完成比賽嘅佢竟然比贏冠軍嘅港姐周婉儀更加搶鏡，點解？全因為佢比賽完喺池邊影相，泳衣領口移位，令到左邊胸嘅乳頭凸咗出嚟，奇怪係陳綺明反應相當慢，記者影咗成兩分鐘相，佢依然係懵然不知。直至有工作人員上前提水，陳綺明先醒覺蝕晒底，上水後仲哭訴話：「點解你哋唔話我知？」又哀求記者唔好登佢張露點相。
不過，據講當時曾經有記者提過陳綺明走光，但佢好似借咗聾耳陳對耳，掛住擺甫士影相，雖然有人事後孔明話係池水太凍搞到佢冇晒知覺，露點都唔知，但都有口痕友話呢單嘢係博宣傳，認真審死官。
陳綺明92年奪得亞姐嘅「最上鏡上姐」及「完美體態小姐」，之後拍過三級片，𠵱家間唔中先會出嚟function。
本欄逢周一至周六刊出