經常聽到人話買樓收租最怕遇着「租霸」，網絡上三朝唔埋兩日，就有業主慘被租客玩嘅傳聞，但其實租客要搵個好業主都好難，好似WingChan就喺個人網誌《友享部落》度，以「好租客vs好業主」為題，分享租客嘅感想。
「好多人租間屋出去，都會希望搵到個好租客，至少唔會搞到自己間屋一鑊粥，更加會準時交租，就可以煩少好多。」
「記得細個時住喺太子700多呎單位，爸爸由未結婚，住到我中五畢業。租平、地方大，當然唔考慮搬，但問題係遇着不良業主。全棟樓都係佢嘅，唔知想收樓重建定換租客收更高租金，竟然用不良手段趕租客。唔搬？佢就會搵人搗亂。記得佢哋最鍾意用萬能膠塞住大廈嘅大門匙孔，阻住大家出入。最慘係鄰居俾人用屎淋，當時佢細女（只係小學生）企喺身邊，被嚇到不知所措。」
「後嚟搬咗去九龍城，地方更大，有千幾呎。業主為人一般啦！很懂得交際的人。都算大家一場業主、租客關係囉！」
「直到父親過身後，因為不能再支持租金，所以再搬。今次搬去深水埗一個不足400呎單位。後來嗰度變得越嚟越複雜，不想每天都要擔心夜放工嘅妹妹，想再搬，點知業主原形畢露，大鬧我哋，差啲連按金都攞唔番！」
「直至搬入𠵱家個單位，真正遇上好業主。她係一位上咗年紀嘅太太，好好人，知我哋父母唔喺度，好關照我哋。租金更主動減咗兩次，屋內嘅維修都好樂意出錢，記得有次佢話客廳嘅冷氣唔夠涼就即管換，但費事喇，一來少用，二來唔想老人家多花錢。換着以前深水埗個業主，一定叫我自己畀。」
想搵好租客 業主唔衰得
「所以我覺得作為業主想搵個好租客，自己都要對租客好啲，道理套在人與人嘅相處都一樣。」
編者按：舊時遇上唔交租嘅租霸，業主想循正常途徑收樓，隨時一搞就幾年，租客可能走埋佬，因為以前嘅租務條例太過保障租客，搞到租霸可以利用法例灰色地帶肆意「行兇」。早兩年新租務條例通過後，業主要收樓容易咗好多，只要畀足通知期就得。