關二哥忠肝義膽，黑白兩道都推崇。
別說笑了，歌都有得唱：「道義放兩旁，利字擺中間。」商業社會，哪有甚麼豪氣干雲，最緊要「分贓要勻」，面對現實吧！
當《無間道》的風光榮耀幾乎全歸於劉偉強，同是導演的麥兆輝會否感到不是味兒？人之常情。
劉偉強這日在關帝廟前坐下，談了很多麥兆輝：「人要長大係好事……合久必分冇問題。」
也談了很多荷李活：「條路好艱辛，一個人去一個人忍，有乜唔妥執包袱都易。」
「做人好多嘢要平衡，好多嘢要顧。」人稱「好命強」，怎能只靠好命？ 撰文：蔡如玉
勸拍檔釋懷
劉偉強與麥兆輝02年合作執導電影《無間道》，風光成績全港都知，事隔5年，馬田史高西斯（MartinScorsese）翻拍的《無間道風雲》（TheDeparted）在奧斯卡掃獎，籠罩劉偉強身上的光彩，明顯比麥兆輝多許多，二人不和傳聞同時四起，當事人口說不是，但麥兆輝與莊文強搬離劉偉強辦公室，麥兆輝還接受了雜誌專訪，嘲諷大家覺得《無間道風雲》的成就讓香港電影界與有榮焉是「集體打飛機」，說自己如何看不起史高西斯，不屑與之同枱食飯，還說了很多劉偉強，內容讓人覺得他酸溜溜，擺明不妥。
「冇可能一路follow我」
劉偉強出發到美國洽談新片兼會史高西斯吃飯慶祝前，接受了本報訪問，也談了不少麥兆輝。以為他應該看過麥的訪問，他一臉茫然表示沒有，只是麥兆輝在訪問刊出後曾致電給他，電話內容不談，劉偉強也很爽快即場拿起雜誌細閱，之後擠出一個笑容說：「冇乜嘢啫。」
「集體打飛機」的言論過不過火？劉偉強輕描淡寫：「佢對件事啫。」麥兆輝的酸，只因大家同是導演，到頭來榮耀卻全歸於劉偉強？他說：「冇得講㗎，day1一齊時已經係我大啲，壓力係出面畀佢嘅，我唔會特登做啲乜去令佢釋懷。老實講，根本《無間道》出嚟之後，我嘅嘢係多過佢。」皆因你名氣本來就較大？劉說：「不嬲都大啲。《無間道》之後，好多人奉承，捧到上天咁，佢都係導演，但個個都只講劉偉強，唔講麥兆輝，呢啲要佢自己抒發出嚟㗎，人哋可能會話佢係劉偉強嘅馬，喺劉偉強公司，所以劉偉強先係老細，係會好多人講嚟挑撥，挑挑吓佢哋就可能當真，咁大個人，可能會因此有啲不平衡。我都做過細㗎，要自己調節㗎嘛，我都有同佢講，40歲人應該有自己嘅嘢，去拍吓另外啲嘢啦，冇可能一路follow我。」
「合久必分冇問題」
「劉偉強唔識計算，做嘢好byinstinct（本能）。」是麥兆輝訪問內容提到的，劉偉強本人不同意，他說：「我計，乜唔計，計成本計marketing，我計算到阿媽都唔知掟呀，我day1就睇數。」
劉偉強為甚麼不帶麥兆輝去美國，麥認為話題對劉很敏感，並說：「我唔想hurt佢。」劉偉強則說：「唔敏感呀，人哋請我一個去咋嘛，冇話請我成個班底去，如果係嘅話，《無間道風雲》就我哋拍啦，使乜畀馬田史高西斯拍。」
究竟麥兆輝是不是擺明不妥劉偉強？劉偉強不想深究：「人要長大係好事。處之泰然啦，領導要有領導嘅樣，篇訪問唔好諗佢喇，可能係當時記者挑撥咗呢？合久必分冇問題㗎，之前我同王晶分時都有傳不和，佢仲打畀我問係咪唔妥佢，我話你信呀？一笑置之啦。」說到尾，劉偉強對麥兆輝處處表現包容：「佢搵老細我會大力支持，佢有困難我都會大力支持。」
終於明白，為甚麼在寰亞電影春茗上，同是《無間道》導演，劉偉強可以坐主家席，麥兆輝則不然，因為大將自有大將之風，劉偉強也坦白：「𠵱家我講嘢會好小心，我哋唔同明星呀，係一個icon，講得好聽啲，我係為香港電影做嘢，唔係話聖人，係要做正確嘅事，培育新一代導演同演員。」
