如果你頂得住《受難曲》（ThePassionofTheChrist）嘅暴力血腥，同喺兩個多鐘內一直心跳100嘅緊張生理狀況，米路吉遜（MelGibson）執導嘅驚慄冒險片《阿波卡獵逃》（Apocalypto）就啱晒你！ 撰文：戶川淳
繼《受難曲》採用古猶太人嘅亞拉姆語同古羅馬人嘅拉丁語為對白後，米路吉遜再次挑戰自己，喺墨西哥雨林重建瑪雅文明，執導一套以古老瑪雅方言尤卡坦語嘅冒險動作片《阿波卡獵逃》。雖然套片比起《受難曲》更加冇大卡士，但意外地拍得非常緊湊，打鬥場面夠晒刺激，畀觀眾最直接嘅感官同情緒牽動，難怪《阿》片早排獲得奧斯卡最佳外語片提名。
活祭村民
本周四正式喺本地上映嘅《阿波卡獵逃》，影片一開始主角黑豹掌同村裏兄弟到森林獵野獸嘅場面已叫人屏息，當敵人到村裏大開殺戒，一支瑪雅部落嘅平靜好快被打破，村民喺敵人嘅石斧、棍棒、武器同秘密進攻之下，毫無反抗能力。
被俘虜後嘅村民戴上鐐銬，被帶往一條前往瑪雅帝國嘅危險之路，不僅要面對恐怖艱苦嘅長途跋涉、突如其來嘅危險，而且最終只有兩種命運──男人被塗上油彩，成為金字塔上嘅活人祭品；女人被賣為奴隸，受盡折磨。為逃回家園同妻兒團聚，黑豹掌決定拚死一搏，踏上無比艱險嘅逃亡路。
片中充斥大量媲美《受難曲》嘅血腥暴力場面，不過就唔使旨意有靚仔靚女畀你睇，梗係啦，話晒都係土人嚟㗎嘛！飾演男主角黑豹掌嘅活地恩伯特（RudyYoungblood）個樣唔算靚仔，第一眼畀人感覺好似細哨朗拿甸奴，但經過逃亡殲敵嘅英勇行動後，發現佢都好有型！劇中飾演佢太太嘅新人演員戴妮雅赫蘭廸絲（DaliaHernandez），全片挺住大肚喺深井救仔嘅場面亦令人感動。
外語難學
講真，米路之前拍嗰套《受難曲》賺到盤滿缽滿都係靠外語，今次再出呢招都係想賺多筆啫！佢自己就話用番當地人嘅語言，可以令觀眾更加投入電影嘅世界，不過班演員就慘啦，因為瑪雅語據講係世界上最難學嘅語言之一，拍攝期間，仲有班語言教師跟場，日日喺片場糾正演員嘅發音，認真辛苦！