所謂積穀防飢，唔少打工仔就算有份收入唔錯嘅正職，都希望搵多啲錢傍身。如果本身份工搵嘅錢僅夠餬口，就更加想開多一條財路幫補家計。
LaurEC喺《MSN》討論區度問網友：「除咗份正職之外，越嚟越多人兼職搵外快，例如做神秘顧客、放貨喺eBay賣等，唔知你哋又做咩秘撈賺錢呢？」
兼職要冇壓力唔沉悶
唔少網友回應話，放工後會去成人教育機構教書，通常都係一啲興趣班，又或者幫市場調查機構做問卷，雖然人工唔高，但勝在冇乜壓力。TisLove就話：「放假會去市場推廣公司做，負責去啲大型百貨公司或超市推銷產品，工作冇正職咁刻板同沉悶，又賺到錢，一舉兩得。」但呢份兼職似乎「揚」咗啲，萬一遇見正職份工個老闆點算？
如果想神不知鬼不覺，搞網上拍賣可能都係一條唔錯嘅出路。Moemoney話：「我喺eBay度做買賣，雖然𠵱家搵嘅錢唔係好多，但到生意上咗軌道後，就會財源滾滾啦﹗」
股市淘金費神風險高
與此同時，有網友即刻話想搵多啲錢，唔一定要打幾份工嘅，最好莫過於喺股市淘金嘞﹗Herring話：「我唔會額外再搵多份工做，但就會借錢去炒股。」不過，如果想喺股市賺大錢並唔容易，門外漢入市前一定要做足功課，揀股時仲要參考唔少資料同數據、市場分析等，真係少啲精神都唔得，分分鐘辛苦過做多份工，而且炒股需要本錢，不單止冇固定收入，仲有機會蝕錢，亦唔係人人都玩得起。