有人喜歡住樓較方便，不過亦有人喜歡村屋嗰種寬敞及閒適，食店亦一樣，喺商場食肆急急腳食一餐，只求為飽肚。最近再行過大圍顯徑一列500m長村屋食街，令我彷彿走進多年前的西貢，有齊打冷、日本料理及茶記等食肆，處處變陣加入新菜式，當中的高粱酒腐乳焗蝦，酒香飄滿整條街。
記者：朱崇德
攝影：譚盈傑
Model：Isabel
靠街搵食夠HomeFeel
某晚行過大圍顯徑街（田心警署對面），因乜解究晚上9至10點，仲見一列村屋燈火通明？老街坊話：「9年前自第一間潮州打冷開咗後，𠵱家一列村屋的地面單位，9成都變咗糖水舖、茶餐廳等食肆！」不論閒日、周末，呢度夜晚8、9點例爆到半夜！村屋食肆風味在於半露天、靠街邊，食物真材實料又HomeFeel，嗰度啲食肆老闆話：「嚟呢度嘅一半係街坊、一半係揸車客；街坊朝見口晚見面，車客食過唔好就冇回頭，呢度旺嘅原因只有靠真材實料！」
正宗潮菜旺爆龍頭
行入街第一樣衝鼻而來的是滷水鵝香！原來已撞入龍頭旺舖生昌潮州打冷；凍蟹、滷水鵝放滿舖面，老闆熊哥話：「我哋日賣廿幾隻鵝、300隻凍蟹、幾百條烏頭。以滷水汁為例，我知有舖頭會落香茅及沙嗲醬添味，不過我係潮州人，堅持正統做法！」據知呢度嘅師傅最長有40多年煮潮菜經驗，好多食材更從潮州進口，小小舖頭有如此堅持，難得！
酒釀乳汁餵蘇蝦 $88
創新潮式新食，以潮州老家自釀的高粱甜酒，加腐乳、紅葱頭將鮮蝦香焗，入口酒味濃香又鮮甜，腐乳加甜酒味道夾得出奇，甜香之酒氣又能帶出蝦的鮮味，據知是今年參加香港食神爭霸戰菜式，必試！
砵酒焗肥生蠔$68
咪睇少呢個常見的砵酒焗生蠔，熊哥由於做海鮮出身，所以用料特別講究，用上流浮山大肥蠔（比一般蠔貴近2倍），配澳洲砵酒焗香，獨門秘技係加入中國洋葱以添其清甜，鮮豬頭肉以增其甘香，係老饕必叫搶手貨，嚟到一定要試。
糯米釀大腸$40
潮州著名街頭小食，香港已冇乜人做！以糯米、蝦米、栗子、豬肉、五香粉充實其中，再以潮州滷水浸香，入口腸皮薄而脆，入口有陣陣滷香，糯米等餡料亦非常入味，大腸香油盡滲其中。
生昌潮州海鮮酒家（26872998）
地址：沙田大圍下徑口村151號地下
老牌名店正宗居酒屋
河合居個名似曾相識，佢其實係同加太賀差不多同期出道嘅元祖級日本食店（95年開業），2000年由紅磡崇潔街搬入顯徑街；講到食物，大廚湯生話：「一般日本料理有上百樣食物出品已好難得，我哋呢度上300款，全部即叫即做，上菜可能會慢啲，但嗰種邊飲酒、邊等菜嘅風味，正係居酒屋感覺。」
河合卷$58
餐廳招牌菜！一般火燄壽司大家可能食得多，原件猛火焗製真係未聽過；取經自美國三藩市，將三文魚壽司卷以牛油果、吞拿及蟹肉，焗至全件甘香，入口三文魚及牛油果等餡料入口即化，而且連飯都有魚香味。
原隻鮮魷魚筒飯$78
8吋長的魷魚筒包着以鮮炒的日式蛋炒飯，再以爐火將其焗香；入口時魷魚筒夠亁身又有微微焦香，香口程度直逼戲院魷魚亁，而蛋炒飯就吸收了魷魚燒出的水份，啖啖飯香，絕對美味。
河合居活魚日本料理（26013150）
地址：沙田大圍下徑口村154號地下
HappyHour歎肥燶叉飯
冬菇亭！香港𠵱家真係少到用兩隻手都數得晒，不過顯徑呢度有個全港最早全冷氣開放的冬菇亭──金城小廚！一列3個「冬菇」有齊中菜、西餐、麵包西餅，真係全港最強，據知附近馬場好多練馬師都喜歡喺度打躉，就知呢度出品有幾正！不得不提呢度嘅早茶，少見凌晨5點開場，鄉村風味！驚好貴？老派叉燒飯$9食到，抵食到不得了就真！
叉燒飯
原價$15 特價$9
飲早茶當然越早越有Feel，不過嚟金城都係歎下晝茶好啲，周末假日逢1:30pm、閒日逢2:00pm，飲茶都有特價，$9碗叉飯，見叉燒肥又燶，老街坊話：「佢哋有自己燒臘爐，所以好新鮮，其他燒味飯都係同價，好抵食！」
豬腩卷
原價$12 特價$7
臘腸卷就食得多，豬腩卷就真係未聽過，據知係店舖自創，以香煎的腩仔肉，加勁粉老芋頭夾包同食！甘香的腩肉，肉汁香油完全滲入芋頭之內，入口粉粉哋，好有特色。
四色水晶包
原價$9 特價$5
$5籠四色水晶包？諗住冇乜期待，點知上枱發現包皮薄到透光，先知非凡。四色為豆沙、奶黃、蓮蓉及綠茶，入口唔太甜，極力推介。
金城小廚（26812212）
地址：沙田大圍顯徑邨熟食亭9-12號
