東龍島垂釣回暖魚穫大3倍

好唔鍾意香港四季不分嘅天氣，3月好似5月咁着晒短袖，過年唔凍，仲有人着住吊帶同我講恭喜發財。但天氣回暖，反而係釣魚發燒友喜訊，漁家話好耐未試過3月見到咁多魚，份量仲要係加大碼。想保證有魚上釣，去西貢東龍島喇，就算出到海食白果，都可以喺魚排過吓癮，魚排仲專登放啲大魚出嚟，畀你感受吓釣大魚有幾好玩！

記者︰劉昱蘭　攝影︰林栢鈞
Model︰Pinkster、Christy（IG綜藝社群）

●太公池有好多呢種好似鯊魚咁嘅叫做懵仲，當自己真係釣緊鯊魚都過癮。

●池內仲有紅魚、星鱸、盲鰽，佢哋就無懵仲大得咁快咁大條。

●釣海魚係好玩啲，但坐魚排唔使喺船上面咁拋，輕鬆自在好多喎。

魚大半個碼　曾日釣過百條

漁民Jimmy從來都未試過喺3月嘅東龍島，可以有一日試過有120條魚上釣，條條都1斤以上，除咗多數係啲紅魚仔之外，仲有啲係大青斑同埋老虎仔㖭。不單只魚夠多，耐唔耐仲有啲大魚好驚喜，一般5、6斤嘅金錢斑竟可以重達8斤，平日唔夠1斤嘅火點變咗3斤重，釣到上水時真係嚇得吓人，仲以為自己認錯魚。Jimmy話今年特別暖，東龍島嘅水溫同水流，都好吸引一眾大小魚類，所以今個月收穫特別豐富。聽到Jimmy咁講，即刻想趁呢個好月學釣魚，問吓要有乜嘢裝備先。

●魚竿有鉛墜、魚鈎、魚絲、同手絞5個部份，初學者成套約花$200。

●如果心懷大志釣大魚，記得睇吓魚竿上寫明嘅負重量。

●如果唔夠位揮魚竿嘅，手絲排就大派用場。

●小記係釣魚門外漢，成日以為出海用魚竿釣大魚，手絲排就引細魚，但其實兩樣工具都可用嚟釣大魚同細魚，主要睇條魚絲夠唔夠力就得喇。

魚排垂釣大小通吃

都算跟Jimmy學咗一陣釣魚，但我份人無乜運，眼見大家都有少少收穫，我就喺個海度等咗兩粒鐘都無料到，已經無乜耐性，索性叫Jimmy快啲載我返魚排玩好過。唔好以為魚排嗰啲魚係養殖魚，釣到都無乜癮，其實佢哋都係專登捉返嚟嘅深水魚嚟㗎，啲魚有大有細，我就鍾意釣魚仔，攞住個手絲排，放喺手指度，就直接感覺到魚嘅郁動好玩啲。如果好彩，喺魚排度都可以釣到幾斤重嘅大魚。

●陳生個個月都嚟東龍島，貪佢交通方便，市區入嚟唔使半個鐘。

當紅加大碼魚流行榜
9吋長

紅魚，只係比平時大咗少少，但日釣過百嗰日，佢哋就佔咗100條，數量創下魚排開業以來歷史新高！

2呎長

火點大咗起碼3倍，變大程度最驚人。

2呎4吋長

金錢斑，由5斤變8斤。

即釣即蒸海上鮮

釣咗半日，最緊要都係醫肚，要食最鮮就梗要即釣即蒸喇，條魚食落真係好滑，除咗本身夠Fresh，師傅就更加係煮魚專家，個個客嚟親都係食魚喎，對掌握火候時間訓練有素，加埋魚排環境寧靜舒服，所有嘢夾埋呢餐真係Perfect。自己海釣交畀師傅即煮即食，畀$30-$50加工費就得。如果喺魚排釣到嘅魚，就要逐條計，1斤$30至3斤$120左右，$120食到條3斤嘅大青斑都抵喇。魚就即釣即蒸，但其他海鮮就要2日前預訂喇。