黑色樽領衫、牛仔褲加NewBalance波鞋，呢個造型，你隨時落樓下茶餐廳都見到，不過當示範嘅係蘋果教主SteveJobs，咁打扮即時變成潮流指標。教主出親Keynote演講，都係呢身咁Casual嘅DressCode，不過教主呢期有新歡，捨棄一貫着開NewBalance，換上喺美國勁Hit嘅戶外運動涼鞋品牌KEEN，即睇蘋果教徒同潮流教徒點睇！
記者︰劉昱蘭
攝影︰譚盈傑
Model︰阿井
SteveJobs喺美國時事雜誌《Times》做訪問，着嘅就係KEENS/S07嘅王牌Newport鞋款。
呢款Newport皮款涼鞋只有一隻啡色，鞋面係可洗防水皮，隻皮落澗濕水完全冇問題，又夠軟熟。
跟教主打扮？
雖然香港人未迷到喪跟SteveJobs嘅程度，但外國真係有網頁，由黑色St.Croix樽領衫、Levi's牛仔褲、NewBalance波鞋乜型號賣幾錢都列晒出嚟，仲會大大隻字"DressForSuccess"咁話。
NewBalance991（$900）
SteveJobs幾乎出親嚟都係着NewBalance，除咗近日iPod同Nike合作，迫不得已着Nike。
蘋果教徒點睇？
Mac專門店"Mactivity"老闆Johnny︰教主有Charm
就咁講Outfit，SteveJobs好有型，每次出大場面都堅持Tee加Jeans，唔古板，好多人迷Mac都係因為呢種敢於創新嘅風格。SteveJobs有個人魅力，幽默同自信真係好Charm，所以有人當Mac係一個宗教，模仿領導者教主嘅行為衣着，都可以理解嘅！不過未見香港Mac迷會迷佢迷到跟佢着衫喎！對鞋都OK好睇，舒服嘅會考慮買。
電腦技術支援Johnny︰對鞋幾舒服
我識個朋友係SteveJobsFan，佢有次買黑色衫會講笑咁話要扮吓SteveJobs，但都係得啖笑講吓啫，我又唔覺香港地會有人咁癲，外國就真係好難講，有Blog真係會幫佢嘅全身衣着格個價，好癲！呢對KEEN睇落都幾舒服。
潮人又點睇？
HotChannel阿然：幾有款！
涼鞋款式簡單唔使花巧都可以彈出，你睇上年對Crocs加啲窿又可以大賣！KEEN款Yogui仲有暗花圖案幾款，鞋形少少收腳款着上腳OK，加埋有Detail，啲色好穩陣！
fink店長Jolly：唔錯！
白色Yogui加淺灰花朵圖案，幾啱女仔着，清清哋又唔會令對Sporty鞋太Lady，Design得唔錯，個價錢亦可以接受，好輕身好舒服，應該會有潮人Market。
DREAM安神︰成熟人Buy
KEEN喺日本同美國都真係幾紅！功能鞋款較重視舒適度，同潮牌比款式就始終差啲。SteveJobs着得KEEN應該係打成熟型市場，遲啲打後生仔市場會出多啲潮款都唔定。
教主涼鞋乜咁巴閉?
KEEN今季新出咗5個鞋款，SteveJobs着KEEN新一代王牌Newport換走NewBalance，KEEN亦喺美國走紅，出道3年多就榮登最舒適悠閒鞋嘅榜首銷量位置！
NewportH2輕身聚脂$690
如果想搵對輕身Newport，佢款H2就係用聚脂做嘅，多個物料俾你選擇，望落都會覺得輕盈啲無咁大嚿，而且仲比貴價皮平啲㖭。鞋面有伸縮帶，調校鬆緊較方便。
KEEN3式絕招
Yogui拖鞋潮得起$550
或者你會覺得SteveJobs個款太平實，咁潮人追捧嘅Yogui就會啱你。Yogui喺日本出咗批多色特別版，證明KEEN喺日本都幾紅，下個星期頭一批限品版喺香港有得賣，記得Check實。白色好啱女仔，而灰黑色呢對都幾有Cyber感幾男仔着。
VeniceH2避震一流$750
有青色同橙色，顏色最Sharp，而且避震加強夠實際，因為鞋床中間加咗壓縮EVA，減低扭傷機會，運動型人最講究。兩邊形闊帶設計，更強力抓住腳掌。
TaosII護埋腳踝$850
包埋腳踝嘅涼鞋係佢特色之處，咁樣就可以結合跑鞋加涼鞋功能，變成最透氣跑鞋，亦係保護最全面涼鞋。Taos暫時共有7色，呢兩對杏加紅最Sharp。
售賣點：Open（31883960）尖沙嘴海運大廈243-248舖