港股昨日跌15點收市，成交雖然多咗，都係得433億，唔好以為咁就係靜市，個市唔單止唔靜，仲好波動，有啲過山車嘅feel，先急跌，後急升，再急跌，殺傷力都幾大，一時唔小心，隨時俾人摑幾巴。
外圍嘅股市麻麻，花旗嗰邊雖然話升，但係就好大沽壓，投資者仲好擔心個樓市，加埋昨晚有通脹數據出街，買盤都係就住就住，數據未出，花旗嗰邊已經有人唱定「滯脹」，乜嘢係滯脹？即係話經濟不景同通脹上升同時出現，呢個情況你話幾得人驚。不過，喺呢個時候講啲咁嘅嘢，應該唔會係巧合，睇嚟係衝住近日市場「催促」聯儲局減息而來，有人望個市升，就自然有人望個市跌，你唱「減息救市」，我就唱「滯脹危機」，花旗個市會點，大家都應該諗到啲嘞。
港股昨日仲係靠啲電訊股同幾隻國內銀行股頂住，電訊股個勢仲可以，但係五行三保就好似冇乜氣。昨日中段個市挾上嚟，其實主要挾隻滙控（005），但收市都係要跌，睇嚟如果下禮拜個市插落，都係會郁隻滙控，𠵱家周街都唱到咁行，話滙控要見130元，睇嚟機會都唔細，早排買咗滙控P輪嘅股民如果未沽，可以吼正股跌落128至130元沽出食糊。
中煤C輪9106：早幾日介紹中煤C輪9106，睇正股（1898）上試7.55元，昨日最高見7.68元，收市7.55元，9106收1.63元，最高1.77元，算係冇呃秤，升幅合理，正股7.55元阻力唔細，跌番落7.45元樓下，隻輪就要食糊，如果正股繼續升，可以將目標推高啲，正股睇8元，9106就睇2元，如果正股破埋8元，隻輪就唔使訂目標價，只要不斷推高止賺位就得。
俊樺