趙廣超說自己不想做Artist，所以多年前唸完藝術，回港後就去了理工教學，「因為除了教書，無乜嘢想做。」看過趙廣超的書，卻肯定他是個大藝術家，這是一種完全嶄新的閱讀經驗，翻開書，知識滿瀉而來，有時是一段段精煉文字，有時是漫畫。它無視傳統書籍由左至右或由右至左的閱讀習慣，這一頁它是由上至下，但到下一頁，卻可能是由中間（插圖）開始向四方擴射性閱讀的。有時是解構，有時是記事，中間突然插入一些小故事。味道紛陳沓至，這種編排，是前所未有的。
「我覺得自己喺度搞嘢。我好蠢，同一段字會寫好多次好多次，成日寫完都覺得……會唔會太悶呀，結果又重新寫過，吖，會唔會咁寫過癮啲。我做嘢毫無經濟效益，一本書要寫好耐。結果用咗三成力去搜集，七成力去刪減。」由於寫的是文化，好多人一聽到「文化」兩個字就把你處死了，而且還要是中國文化，於是花盡心思。「好多書，一係想佢出嚟靚，花好多時間搞設計，結果內容好空洞；一係就係內容好充實，但其實悶到嘔。」
寫中國椅子、寫紫禁城建築、寫清明上河圖，都是中國文化，但趙廣超跟大家一樣，由西洋藝術開始，「我對西方藝術認識當然比中國多啦。」年輕時在法國/瑞士唸造型藝術，對空間/建築興趣濃厚，研究的是埃及金字塔，常帶文化團（帶當地人）遊大教堂、羅浮宮，「最大感受，係文人/讀書人沒有『國畫』這個概念，畫就是畫，但若你認識宋代的畫，他們會認為『咦，你識嘢。』相反喺香港，如果你話鍾意國畫，可能好Embarrassed。一啲港人去咗法國，習氣好重，有段時間，甚至有香港人會認為唔識中文係Credit。」
在理工教學時，見學生毫無保留地擁抱西方藝術。「我諗佢哋可能無機會接觸到（中國藝術），去圖書館睇，發現其實好多書喎，我一廂情願認為可能係書寫得太深。」於是開始研究中國古藝術，再利用假期到國內看真跡。「每個民族，都有他的Personality。我希望每一代都對自己嘅文化有一個觀點。」目標明確，於是把研究寫成書。他的作品，幾乎本本都得獎，市場反應亦佳，「我覺得自己好幸運。《一章木椅》台灣出版社只看了幾頁，就『現兜兜』買咗幾千本。」外地出版社看過都有興趣，正商談出版英文版、簡體版，甚至將與故宮、紫禁城合作，「嘩，呢班人，全宇宙最強㗎嘛，起初合作都好驚。」說這話時他突然像個學生，「曾經有個上海博物館館長寫Email給我，好驚㗎，點知佢係咪覺得你有嘢寫錯咗。但好好彩，佢睇咗反應都好好。」
至於香港呢，卻是叫好多過叫座，「原來最受落的是專業人士，唉，我本來想寫給二十出頭看的。中國文化，要到近50歲先會搖頭擺腦咁話佢正！好有退休情調，但如果20歲就有興趣，佢仲有好多時間去發揮。」這當中不無夫子自道，對時光飛逝、與中國文化忘年相遇的感歎。「幾歲就學過『歸真反璞』四個字，但要到幾十年後先知點解。」
直接問他，研究了半輩子，東西藝術在他心中可能分出高低。他微笑：「內心就梗係有啦。」
沉吟半晌，他說：「西方藝術，成個節奏都係由裏面走出來。西方藝術講『放』，講Expressive，由Grace、到甜美、到壯麗，每一幅畫都係一台戲；中國人話潛龍勿用，『龍』係Positive的；『用』係Technical的；最難係一個『勿』字。中國要表現但亦要表現得含蓄，咁當然收係難過放。」西方沒有收？Minimalism不是嗎？「那是減。西人減，都依然係一台戲，想話你知我減到幾多！」收到少一筆就斷，多一筆一線卻嫌累贅，用最輕的一條線，隱藏再三才品嚐出來的無窮內容。「中國的Master，到死前畫的一條線，依然同第一條一樣咁輕。」
問過幾個他的學生，都話「超哥？勁呀。」相信他是明師，「超哥」卻已把教職辭掉，現每天躲在家中寫書。「寫紫禁城後期經常北京、香港兩邊走，我怕教書會馬虎。」談教學談教育，他慨歎：「𠵱家流行講通識，又話要開通識科，其實通識係結果，係個好大的綜合體，邊可以咁讀㗎。通識大師，我哋春秋時代就有啦，孔子從射箭、騎術之中可以講到哲學，𠵱家我又未見過有騎師可以同你講到哲學噃！」
記者：何兆彬
攝影：伍慶泉