「紋身」自從整容之後，人氣好似突然急升咁，佢標榜勇敢承認整容，得閒又寸吓其他整咗唔敢認嘅女星，乘機博見報。早排佢同朋友夜蒲，有唔少朋友嘅朋友在場，席間紋身好大聲咁問一個男仔：「你覺唔覺我個樣唔同咗呀？」點知人哋話唔識佢，仲問番佢轉頭：「點解你個樣會唔同咗呀，你以前乜嘢樣㗎？」紋身好似好大件事咁，用高八度聲線講話：「唉吔，乜你唔知咩，我整咗容吖嘛！」佢講完，個男仔就冇乜反應，但嗰枱嘅女仔就陰陰嘴笑，話從來冇見過人咁以整容為榮，今次都算係大開眼界。關仁覺得紋身公開認整容確實係好有勇氣，但開口埋口都提住，就似乎有啲走火入魔。
Textby關仁