由攝影師到國際名導，劉偉強的綽號叫「好命強」，是文雋取的，他自言是「畸形」電影人，當年沒有王晶的催生成長，三級片、古裝片等甚麼戲都拍，未必能有今天的成功。繼吳宇森和李安等導演後進軍荷李活，劉偉強入鄉隨俗，首要是做好心理調節，撇除香港導演主導的慣例，適應美國由監製主導的環境，他執導的西片《TheFlock》也因此被投資方動了刀，在他完成作品後再剪接，單看事情表面，很容易有劉偉強被拆招牌的誤解。
荷李活講民主
劉偉強解釋當初簽約時訂明自己擁有兩個剪片權，投資方有權作最後重剪，不過最後批准權仍屬他所有。他說：「呢啲美國嘅制度係權力嘅象徵，唔係保障，監製由搵劇本搵投資搵導演，成個故事發生都係由佢搞出嚟，佢哋都要保護監製嘅權力，而且關係到好多投資者同保險公司，所以大家都揸住劇本做人，到最終拍晒部戲出嚟，同原先劇本變化係好少㗎。今次情況唔係我想改嘢，係對方想加啲色情暴力，反而係我唔想加。」
香港拍戲導演話事，荷李活則是各單位都可根據自己利益有發言權，劉偉強說：「民主係好啲，但仲有好多政治因素同外在因素，會變假民主！」名導拍出來的作品要被人動刀，予人拆招牌感覺？劉偉強說：「係你哋講啫，有啲人會睇得好嚴重，食得鹹魚抵得渴，我睇得好開，人哋嘅制度咁耐都係咁，自由度唔係冇，你可以揀takeitorleaveit。有啲嘢要一步一步爭取。」
美酬勞十級跳
多少電影人對荷李活趨之若鶩，除了名聲外，當然是錢作怪，據悉劉偉強在香港拍一部戲收三百萬港元，在美國也是三百萬，不過是收美金，另加世界分紅，他也大讚：「美國分紅制度好健全，香港呢，最近《無間道》都有分紅，以前《古惑仔》都分到啲，《風雲》就冇，我當然可以追啦，諗住佢哋自己識做，擺明就唔識做囉，其實𠵱家好啲啦，好多公司都上市，條數要清楚。」
進軍內地市場
拍完《TheFlock》，劉偉強對荷李活的體會較深，他說：「去荷李活係一條艱難嘅路，唔係去就發達，吳宇森同我講，應該一個人去試探咗先，唔係死咗點算呀？咪冇嘢撈，要有個安全網，嗰度唔掂，返香港都仲有得拍。你話帶隊人去做，我覺得不如喺美國搵啲資金返嚟香港拍最實際，一個人適應比一班人適應好，忍都係一個人忍，有乜唔妥咪執包袱囉。」
現在，劉偉強的心願是拍一部《成吉思汗》，吳宇森拍《赤壁》有八千萬美元（約6.2億元）的投資，劉偉強目標更大，他說：「我要有一億、二億美金以上，唔係咁難㗎咋，有決心就得，賺唔賺得番？梗得，3年後內地會多三倍戲院，𠵱家每個月都有一百間新戲院啦，大家都對呢個市場虎視眈眈。」
攝影：陳偉權 協力：陳月媚、陳慧安
