有睇開漫畫嘅讀者，應該都識Bleach，響日本街知巷聞，當地一早推出咗動畫版，正因為Bleach漫畫同DVD都賣得，仲有好多不同款式嘅商品，如海報、真人版模型、Cardgame等，香港呢？其實十二月已推出DVD第一季，《死神代行篇》共5篇。第二季亦向3月9日推出，《屍魂界．潛入篇》共4篇，每篇分4話，而第5篇要到4月才有。
DVD用日語原聲LPCM，無壓縮音效，細緻度比DTS更好，唔想齋聽日語，仲可以選擇粵語，但畀我揀，梗係聽原音睇中文字幕好過啦，質素好啲嘛！
最新一季係講黑崎一護等人，為咗救將要被處刑嘅朽木，全部人闖入屍魂界。響屍魂界等緊佢嘅係守護靈廷嘅「護廷十三隊」，當中包括曾打敗一護嘅六番隊隊長朽木白哉和副隊長阿散井戀次。佢哋救唔救到人呢？睇吓咪知囉！已經睇咗漫畫嘅朋友，不妨睇埋動畫版，感覺真實好多！
文：盧曹珠
售賣價：$89
發行：亞洲影帶
查詢：27505595