無意打破曾志偉的金漆招牌，但看《向世界出發》預告中他一時在六星級酒店床上碌嚟碌去，一時又如小Fans拜見汶萊國王，一時又做七日和尚大徹大悟說要千金散盡才去世，汶萊雖有點浮誇，都唔使咁誇！坦白講：「我係唔抵得，鬼叫我上幾代無俾人賣豬仔去婆羅乃（汶萊），今天當地人唾手可得嘅車同樓，我要盡半生之力才得到！」我係妒忌，點呀！
文、攝：林思樂
鳴謝：汶萊皇家航空、GoldenTouchHolidays、
TheEmpireHotel&CountryClub、汶萊旅遊局
12樓高大理柱下 感覺渺小
我無幸如曾志偉般入到蘇丹（汶萊皇帝正式稱號）的皇宮，但也參觀了那間號稱六星級的帝國酒店。以前是皇室消遣玩樂和接待外賓的行宮，6年前重新裝修後正式對外開放，令一介平民也可體驗奢華的生活。
從機場坐車前往只需15分鐘便到酒店入口，但車仍繼續駛入如國家公園般的道路，兩旁綠意盎然，開始感到酒店有180公頃大！幾分鐘後才到大堂，剛好黃昏時分，被落地大玻璃外的黃金夕陽和南中國海震嚇了！想抬頭深呼吸穩定情緒，才發現置身於有12層樓高，由意大利運來的21K鍍金大理石柱下，更加手騰腳震。
放低行李後急不及待去傳說中12萬港元（同下）一晚的「帝皇套房」，不說克林頓和米高積遜，連我們的張學友都住過！我，只是參觀。那個擁有4,000部跑車、500部勞斯萊斯、身家有2,730億的蘇丹皇帝，每逢在附近連走幾場活動或會議時，就會訂套房做更衣室，費事麻煩返皇宮換衫，花12萬換件衫，並不是普普通通的奢華！
地毯都貼金 任踩唔嬲
「嘩！」一推開7千呎的帝王套房大門，即被金光照到要立刻戴回太陽眼鏡，開始感到已敗於慾望手上，但仍不懷好意問：「真金嚟𠺢？」訓練有素的酒店職員Danny細細聲說：「你肉眼看到的金色，不是真金就是鍍金！」天呀！這套房的設計師一定絞盡腦汁，天花圖案、吊燈、枱腳、水龍頭、椅背、梳妝枱甚至地毯都有金，真誇張！
邊游水邊看電影
長長走廊上，有書房、遊戲房、廚房和有古典鋼琴的飯廳，直行了200步仍未到盡頭，這時右邊突然出現一部私人電梯直達客廳和睡房，大床前有特大電視連B&O音響。到盡頭喇？Danny話：「推開呢道門睇吓啦！」一推，竟然是11米長私人泳池！一按鈕，螢幕從天而降，可以邊看電影邊游水，唔知會唔會浸嚫呢？
超豪酒店 Local度假地
住帝王套房是富人，但以全酒店計，住客最多仍然是汶萊人！Danny自豪地說：「我阿媽都好鍾意來度假，話有出國旅行的輕鬆感覺。」汶萊的娛樂設施不多，當地人閒時就入酒店的俱樂部打golf、做spa、游水，只需要付得起半年$7,089會費，或者貪方便一次過用50萬買個終生白金會籍，也可得閒來行個圈，分分鐘可順道認識一下皇親國戚及達官貴人，一生也受用！Danny又話：「自從在這酒店工作之後，去到其他國家啲酒店都會問點解咁細嘅。」頂不順他的口氣，我還是返入套房摸摸那全球僅四隻的水晶黃金駱駝吧！
TheEmpireHotel&CountryClub
價錢：標準雙人房$2,670起；帝王套房$123,420
網址：www.theempirehotel.com
《向世界出發》「曾志偉：國王與我」
播映日期：19-25/3，10:35pm，無綫翡翠台
汶萊郵票大部份都以蘇丹的靚仔相做圖案。
出門handbook
簽證：持BNO及特區護照均需要簽證。查詢：22735976（汶萊駐港領事館）
機票：乘汶萊皇家航空直飛汶萊首都斯里巴加灣市，來回機票價由$2,140起。查詢：www.bruneiair.com/hongkong
語言：馬來語，英語。
貨幣：1汶萊幣BND約兌5.1港元
電壓：220V、50Hz，三腳扁插頭
長途電話國家號碼：673
旅遊查詢：www.tourismbrunei.com
今日汶萊
氣溫25-31℃
濕度74％
11-3月：23/2是國慶日，有多項大型慶祝活動。
4-7月：15/7是蘇丹誕辰，他會出巡與全國人民慶祝。
8-9月：13/9開始齋戒月，回教徒從早到晚都不飲食。
10月：13-15/10是回教的新年，亦是汶萊皇宮的開放日。