無論因為《金玉滿堂》一碟炭燒亁牛河，抑或是《黃飛鴻》入面一雙刁鑽鬼腳，都令人好掛念久未露面嘅七哥（熊欣欣）！早知七哥以前鍾意同朋友鍊車，一雙「踭趾腳」更係靈巧，加上佢做慣大奸大惡角色，令小記主觀地以為佢會揸架襯番台型嘅辣跑登場，點知嚟嘅竟然係架5門揭背Harrier，完全Family感覺。七哥仲滋油淡定話：「為咗老婆同囡囡，自動波車始終方便同安全啲！」
文：許一楓
攝影：譚盈傑
打得又煮得
幕前勁惡嚇怕膽
事先聲明，小記對七哥嘅印象只限於電影中嘅角色，佢有啲Cool，個樣令我有啲怕，驚佢有問無答……心情絕對係忐忑不安！點知一見面，我嘅疑慮當堂掃清。
約好七哥同佢助手到西貢影相，正擔心七哥會唔會嫌地方太遠？點知七哥劈頭一句，「我同西貢好有緣㗎，以前做飛仔年代，經常同朋友喺呢邊鍊車，之後結咗婚生埋囡囡，就經常嚟呢度遊車河兼燒嘢食！」真係完全無諗過面前嘅七哥，可以咁斯文、親切，完全唔擺款，小記第六感錯晒！
為囡囡放棄飆車
講到呢架用咗7年嘅ToyotaHarrier，原來完全係為咗屋企人：「以前一直都揸跑車，93年開始仲同朋友一齊玩車，『踭趾腳』都係當年咁樣練出嚟，直至7年前同老婆計劃生BB，於是決心買番架舒服、安全嘅房車。」為咗BB，七哥連開快車嘅習慣都改埋：「以前同老婆兩個人，間唔中都可以飛吓車，不過有咗個囡囡，就唔可以再揸咁快囉！」
回想以前一個人揸住架車鍾意去邊都得，夜媽媽去Disco齋企又試過，元朗、粉嶺、屯門通通都有七哥同佢架愛驅嘅足迹，不過呢幾年車嘅用途就唔同晒，「如果唔使出外拍戲，星期一至五會揸車接送囡囡返學放學，六同日就一定全家去公園或遊吓車河，享受天倫之樂！」
考車牌4次先Pass
打功夫、任何高難度動作，七哥都有一Take過搞掂嘅信心，但估唔到新牌仔考車嗰陣，竟然要呢位大俠考4次先Pass！「真係無諗過自己要考4次咁多，4次都係考棍波，記得第一次就衰揸得太快，第二次就同巴士爭線失敗，仲要被迫停喺馬路中間，第三次直頭唔知發生咩事而肥佬，卒之要考第4次先Pass，我覺得喺人生嚟講，都算幾失敗㗎！」
講到意外，不得不提01年喺法國拍戲發生嘅大事件，「嗰日喺法國中部，大約凌晨3點幾，我行緊大路，突然小路有架小巴駛出，我煞唔切車炒埋佢度，助手因為無扣安全帶，成個頭撞埋擋風玻璃度！」所以七哥經常語重心長同人講：「有無警察都好，安全帶關乎性命，一定要用！」拍攝當日，就算影一個扮開車嘅Shot，七哥都要扣好安全帶，呢個已成上車後嘅指定動作！
旋風腿真係有風！
正式埋位影相，若然只叫佢倚車擺Pose「扮靚女」，好對唔住讀者啫！玩鬼腳七、跳上車頂呢啲高難度難動作，點都走唔甩啩：「考我？我幾廿歲人喇喎，我怕㗎車會爛，如果爛咗係咪你哋賠先？」攝記剛Set好相機，說時遲那時快，這邊廂仲見佢拉筋做熱身，突如其來一下過頭旋風腿，已經踢到鏡頭面前，攝記眼明手快㩒得切Shutter，過後只讚歎一句：「有陣風吹埋嚟！」令攝記、小記兩名二打六親身體驗快腿嘅厲害，鬼腳七的確唔係浪得虛名！
老編插嘴：個個以為係女
當年睇《黃飛鴻》時，奀頭奀腦嘅鬼腳七鍊贏無敵嘅李連杰，比奸角嘅拳王周比利更出位，令老編印象深刻，並取代另一腿王盧惠光喺心目中嘅地位。問同事知唔知邊個叫熊欣欣？所有嘅答覆係：「知！身材好勁嗰個女演員嘛！」Sorry喎，嗰位叫洪欣，熊欣欣Man過你同我！
Harrier曾掀市場爭奪戰
堪稱是日本SUV龍頭大哥的ToyotaHarrier，在98年初推出時已惹來不少車迷注視，而本港一眾水貨車行亦爭先將之引入，以饗車迷。在抵港的Harrier群中，既有2.4公升版本亦有頂級3.0公升版本，而且不少改裝公司也有為其推出不同改裝配件，包括全車包圍、跑車懸掛等等，當中又以Zagato改裝版本，最受車迷歡迎。
記者：鄭達基
ToyotaHarrier3.0規格
引擎：2,994c.c.V6DOHC
馬力：220ps/5,800rpm
扭力：31.0kgm/4,400rpm
傳動：4前速自動波
當年新車價：約$400,000
現時二手價：約$80,000起