陳奕迅在樂壇搏殺，Eason嫂徐濠縈則負責湊女，不時帶着兩歲囡囡康堤捧Eason場。徐濠縈前晚大爆囡囡非常黐身兼容易呷醋，除了媽咪出街時會大哭外，又不准她抱其他小朋友，更嚴重到為了霸住她，居然叫爸爸Eason不要愛媽媽！
徐濠縈、劉浩龍、楊愛瑾（Miki）、名模陳嘉容和顏穎思等，前晚在中環D-mop出席PumabyMihara Collectorsbook酒會，同場更展出PumabyMihara新裝。
拉住手唔畀走
連走兩場的徐濠縈，先出席SeebyChlo囗活動，然後趕往捧D-mop場。她透露之前獲邀與設計師MiharaYasuhiro（三原康裕）晚飯，她說：「第一次食飯，都幾得意，佢問我喺邊度做腳底按摩好，我咪介紹一間畀佢，但其實我冇幫襯過呢間舖，我咁忙要湊女，邊有時間去按腳呀。」
提到女兒陳康堤，徐濠縈即大爆女兒十分黐身，她說：「個女好呷醋，成日唔畀我出街，頭先中途我要返屋企換衫，佢一見我就拉住我隻手狂喊，唔畀我走，好似好淒涼咁，要叫工人拉開佢先肯放手。」
「Don'tlove媽媽」
徐濠縈更笑謂女兒是名副其實的呷醋王，她說：「我抱其他小朋友，佢都要拉開我，將來如果再生，佢肯定呷細佬醋。佢誇張到連佢老竇Eason（陳奕迅）嘅醋都呷，叫老竇『Don'tlove媽媽！』之後叫我坐番去佢身邊，話『Iget媽媽』。」不過，徐濠縈並沒因為囡囡掛念而早歸，相反她看完衫，再與數位女性友人轉場往翠華醫肚兼繼續談天。
採訪、攝影：JessicaNgan
