肥仔K到吳哥窟自由行，冇啖好食，坐十小時巴士返回曼谷之後，大嘆返回文明，知道柬埔寨之窮困，超乎想像。返到嚟香港，到海都食飯，更覺恍如隔世。如果佢參加豪華旅行團，住八星級酒店，或者佢就唔會知道柬埔寨之真實情況，無助於佢嘅世情教育。
財務Ｎ以前攞文部省獎學金到東京攻讀經濟，一路讀到博士班，寫埋論文，但大學按照日本慣例，冇畀博士學位佢，只係給予一紙證書，證明財務Ｎ係「博士課程修了」。拿住「修了」，返回台灣，冇大學肯聘請財務N做助理教授，於是財務N輾轉去日本求職，再嚟香港，卒之在香港發達。財務Ｎ聽完肥仔Ｋ講日本近況，就對肥仔Ｋ講：「如果要繼續讀博士，就唔好喺日本讀咯，去英國或美國更加適合。日本治學，始終係冇英美咁好嘅。」
據肥仔Ｋ講，日本人普遍唔識英文，大學生平均唔識講英語，故此外國學生好難與日本人溝通。能夠以英語授課之日本教授比較少，唔少國際學生選課選到索氣，被迫讀多一至兩個學期先至可以修滿足夠科目畢業，不過日本政府畀獎學金畀到你夠，拿獎學金之外國學生算係冇乜怨言。自費讀書嘅，做多啲兼職啦，好多中國學生留學日根本係全職打工，兼職上課。
肥仔Ｋ見到太古城有唔少日本人出入，相信日本人係太古城住客，呢種情況，在日本甚為少見，因為日本業主唔鍾意租屋畀外國人，六本目一帶豪宅除外。喺大學區，一位香港學生搬入一個單位唔夠一日，業主就反悔要佢搬走，話鄰居唔高興有外人入住喎。呢位學生變成兩頭唔到岸，狼狽到極。肥仔Ｋ嘆曰：「日本人過份內向，把口講國際化啫，行為上就處處防範外人破壞或者衝擊佢哋嘅安定社會。一啲自外國回流嘅日本教授好唔高興日本學生在課堂上只識聽書，永不反駁。佢鬧還鬧，日本學生一概唔駁嘴，奈何！」