的士車廂可上網？冇眼花，佢唔似地鐵用WiFi，亦唔係GPRS，係3.5G，即係最貴嘅流動上網HSDPA。
你會問：「短短搭程車有乜用先？」慢慢上網搵料就冇可能，CheckEmail勉強得，但最舒服係過戲癮。小記搭程「過海的」，用Notebook單撈睇《蜘蛛俠3》Trailer，僅1分45秒，由牛頭角搭到灣仔，夠你睇10次Trailer咁多㗎！
記者：陳國輝
攝影：林栢鈞
ImageGirl：Chimpy
唔好通街截 Call車最方便
咪聽到免費玩3.5G就興奮到彈起，其實呢項由Smartone-Vodafone提供嘅服務，暫時為試行階段，只有3個月，口碑好，可能會繼續搞落去。呢樣嘢新鮮方便，但全港只得100架的士提供此服務，要爭餐死先搭到，仲指定係「紅的」（專走港九路線）。
好彩，的士司機跟住補充句，如果想乘搭免費上網的士，仲有其他辦法，就係打電話Call車……但諗諗吓，唔係喎，小記工作地點喺將軍澳工業邨，離市區偏遠，如果最就近嗰部紅的喺觀塘過嚟，咁咪要等成半粒鐘？
拮USB即玩 快過去Cafe用WiFi
查實喺的士上網唔係一件複雜嘅事，你會發現USBModem就放喺前排座位椅背。點用？簡單到細路仔都曉，將USB拮落Notebook插槽，電腦就會自動SearchDevice，然後自動安裝所需軟件，第一次用嘅話全程大概花兩分半鐘，第二次再用就即插即上網，唔使司機大佬做「柴可夫」，一個人已經玩得掂；反過來諗，喺Cafe上網仲要識小小電腦知識，例如要SearchWiFi，仲要申請WiFi服務，而的士上網就只要帶住部Notebook就搞掂，唔上網嗰陣就拔走條USBCable，簡單到痹。
瞓低上網 爽爆
記得上星期同大家講過，地鐵站玩WiFi最忌冇座位提供，搞到又要挨、要企、甚至乎要坐喺地下玩，認真可憐！
喺的士車廂就舒服得多，最起碼實有得坐，就算後排坐滿4個人，最多都係迫少少；如果得自己一個搭就爽爆，你點挨點瞓，唔會有人理你，當然，始終你坐喺架車裏面，必須扣好安全帶，假如你當張床咁瞓上去，唔單止俾的士司機噴到一面屁，仲要記住唔扣安全帶全屬乘客責任，發告票罰錢唔關司機事，雖然瞓上梳化係幾咁Relax，但呢度唔係屋企，自重啲好喎！
的士司機：「畀個仔做功課。」
有的士司機諗到騎呢搵外快方法：「當架車泊埋一邊休息嗰陣，你可以租畀啲鬼佬、上班一族上網，或者Check吓Email，賺餐飯錢都唔錯。」
妄想！試問邊個人會咁無聊走入的士上網，如果佢當正你部車係流動StarBucks仲大鑊，買埋飯盒、飲品、零食，邊食邊上網，到時你唔日日洗車都唔得。有啲諗得比較實際：「唔得閒喺屋企湊仔嗰陣，不如帶埋佢返工，可以照顧啲仔女，又唔使錢上網做功課，何樂而不為？」
現場測試：18分鐘單程「過海的」可以做啲乜？
究竟喺的士裏面玩3.5G，連線速度有幾快、穩唔穩定先？今次小記作實地測試，由牛頭角搭到灣仔，途經東隧、東區走廊。司機話，如果唔塞車嘅話車程約18分鐘，呢段時間你可以上網做啲乜？即睇！
起點：牛頭角創紀之城
目的地：灣仔會展
Step1 自動安裝軟件
所需時間：2"30"
插USB落Notebook之後，電腦會搵到Device，跟住自動安裝。
操作介面好簡單，用家可即時睇接收強弱，以及單撈速度等。
Step2 上網搵蘋果電影
所需時間：8"00"
成功安裝程式之後，便可利用IE上網，呢次搵Apple嚟測試。
由於入面太多Trailer，你可能要花幾分鐘慢慢搵，啱嘅話就Click入去，會彈出呢個畫面。
Step3 播1080p《英女皇》Hang機！
所需時間：4"30"
第一次嘗試單撈1080p高清播放格式，點知睇咗幾秒之後停咗一段時間，跟住仲Hang埋機。
Step4 播720p《蜘蛛俠3》流暢到痹！
所需時間：1"45"
經過教訓，再嘗試單撈720p格式影片，即刻順番晒，串流速度平均為80kbps，入隧道亦冇受影響，過程流暢。
Total：約17"00"
試用後記：日頭太曬冇嘢睇
表面睇的士上網的確好方便，唔單止可以幫你慳時間，上網穩定性亦非常高。但測試完嘅感覺係，架車搖嚟搖去，要輕鬆控制隻Mouse難度極高，再加上日頭搭車嗰陣，陽光肯定曬到入車廂，如果冇番部靚芒Notebook，都咪話唔睇到你頭暈眼花。
