近日天氣回暖，大地回春的感覺終於回來。寒冬過後，好多動植物都為配種做好準備。其中的本地青龍蝦，每年3月一到就進入當造期，蝦身夠大隻，蝦肉最肥美，喺呢個時候食本地青龍蝦，比食澳洲或波士頓龍蝦更加好味！
記者：梁學文
攝影：林栢鈞、伍慶泉
Model：Phoebe
準備交配
增磅肉地厚
人人都知5、6斤重的大龍蝦最好味又夠豪，不過喺香港好難食到又平又大隻的龍蝦。相反，本地青龍蝦就又平又抵食，每隻約重半斤至斤半重。每年3月中旬左右，龍蝦為了預備交配繁殖下一代，都會養尊處優，朗豪酒店明閣的師傅輝哥話：「3月份天氣唔似冬天咁凍，亦唔會似夏天咁熱，再加上要預備進行交配，所以好多龍蝦都會儲肥自己，所以會厚肉啲，肉質亦會滑啲。」
比波士頓龍蝦嫩滑
點解叫做青龍蝦？皆因蝦身呈青綠色，而味道就跟紅龍蝦好接近，蝦肉較滑且鮮味夠。雖然青龍蝦不像澳洲或波士頓龍蝦般啖啖肉，不過相對細細隻，肉質比大龍蝦的嫩滑。現時印尼和緬甸等地都有出產，而本地和中國沿海的產量比較多，價錢亦較大眾化。
青龍最適合用來煮同蒸，因為肉質滑，煮完依然好有口感，明閣師傅輝哥話：「青龍蝦多數喺淺水嘅環境生長，所以水壓無咁勁，蝦肉就會較滑，亦唔會『嚡』口，就算煮完、蒸完同炒完，蝦肉依然爽口。」
香檳忌廉汁龍蝦$25/両
師傅先將龍蝦炸一炸，鎖住龍蝦的肉汁和鮮味，然後再用香檳和忌廉煮汁，最後加入龍蝦一齊煮。用香檳煮過，蝦肉入口有陣酒香味，而加了忌廉汁，令蝦肉除了爽口之外，還有一種香滑的感覺。
鹹蛋黃焗龍蝦$25/両
如果數口感豐富，用鹹蛋黃煮龍蝦肯定最豐富。上湯加鹹蛋黃煮成湯，然後用來燜龍蝦，蝦肉吸收了鹹蛋黃的味道，鹹香味重，且有種起沙的感覺。
海膽醬焗龍蝦$30/両
龍蝦原來的味道經已夠鮮，再用海膽醬煮，味道就鮮上加鮮，咬落仲好香滑，面頭灑上葱，味道更加清香。
鮑汁雜菌焗龍蝦$25/両
用扣完鮑魚的鮑汁煮龍蝦，味道最濃郁。一上枱，尤其是熱辣辣上枱時候，雜菌味就更清新。雖然鮑汁味道濃，亦無損龍蝦的鮮甜味道。
明閣（35523300）
地址：旺角上海街555號朗豪酒店6樓
營業時間：
11am-2:30pm、6pm-10:30pm
3種芝士焗成半生熟
開了個幾月的光明頂，除了Menu上面的中西美食外，廚師Dracula仲會揀最時令的材料做SpecialMenu，所以今個月就揀咗青龍蝦做精選菜式。Dracula話：「今個月的青龍蝦質素好好，蝦身夠肥之外，仲有好多膏，上個禮拜食咗隻，啲膏咇晒出嚟，真係好正！」最重要是光明頂位於西貢，所謂「近水樓台先得食」，在這裏容易搵到靚貨，亦有好多種類可以揀。餐廳內以中式設計為主，店內所有擺設都可以搬埋返屋企，不過當然要放低錢。
芝士龍蝦意粉約$240（時價）
龍蝦用酒、鹽同黑椒先醃，然後加入CreamCheese、Mozzarella同CheddarCheese煮一煮，甫上枱就已經有好香芝士味，入口仲好特別。放入口一咬，原來是半生熟，別以為未煮完，師傅話半生熟的口感更彈牙爽口。
SeafoodPlatter
$320/2位用（須1日前預訂）
SeafoodPlatter有螄蚶、蜆、蟶子等，當然不會缺少主角青龍蝦。SeafoodPlatter除了要新鮮之外，醬汁亦很重要，這裏就有多款醬汁可以揀，好似傳統墨西哥沙沙汁同紅酒醋香葱汁，客人亦可要求師傅調校喜愛的醬汁。
光明頂（27917899）
地址：西貢福民路55號地下
營業時間：12mn-2am（逢星期三休息）
