細個嗰陣睇大友克洋嗰套《亞基拉》，硬係覺得佢揸嗰部電單車好科幻好有型，估唔到當年嘅科幻設計今日居然可以變成事實！美國VentureVehicles開發咗一部同亞基拉電單車一樣咁型嘅CarverOne，將私家車同電單車嘅優點合而為一，既有私家車「鐵包皮」嘅安全性，又有電單車嘅靈活性，兼且有引擎加馬達嘅混能版本，又有齋馬達版本，加上本身耗油量低，簡直係集有型、靈活、環保三大優點於一身。
載客量方面，一前一後可以載兩個人；採用汽車用嘅環形軚盤，但轉彎嗰陣又會好似電單車咁傾側嚟保持平衡，即係話可以狠狠咁片彎，型到爆。而售價方面亦係介乎電單車與私家車之間，最平型號要18,000美元，即約港幣$140,000。
記者：周達之
相關網址：www.venturevehicles.com