近期搞到滿城風雨嘅美國次級按揭房貸危機，可能再次觸發日圓套息平倉潮，拖垮全球股市之餘，甚至令美國經濟出現衰退。有網友喺《香港討論區》話：「次按危機爆起上嚟，好似火燒連環船咁，更會係大戶造淡美股嘅藉口，港股到時都幾難獨善其身。美國人以低息借日圓炒樓，如果樓市爆煲，要將日圓平倉還錢，產生嘅連鎖反應，就好似骨牌咁一個推一個，好多美國銀行同按揭公司都會受影響。」
HSDI亦話：「次級按揭審批寬鬆，樓市升嗰陣時就唔覺有問題，但𠵱家樓市下滑，好多樓都變晒負資產，銀行收樓都冇用，根本資不抵債，就算大型次按公司NewCentury都要被迫執笠啦！」
最嚴峻考驗 經濟放緩
次按危機影響咁大，加上港股同美股息息相關，唔少網友都諗吓有冇方法可以解決今次問題。網友SHAW笑言：「如果我係伯南克，我會先選擇減息救樓巿，減息可以刺激買樓意欲，𠵱家通脹程度又唔係想像中咁大，經濟放緩先至係美國面對嘅最嚴峻考驗。」
雖然減息可以暫時紓緩樓市持續惡化嘅問題，又可以刺激經濟，不過後果都幾嚴重，fag回應話：「中長線嚟睇，減息會降低美元嘅購買力，美元會下跌，美債吸引力亦大減，各國央行爭相拋售美債，到時全球金融市場都會出現大地震。今次次按危機真係考起伯南克嘞！」
啱啱過去嘅星期三，美國公布次級按揭拖欠率升到4年嚟最高水平，拖累道瓊斯工業平均指數暴瀉242點，港股挫496.21點，市值單日蒸發3200億元，都咪話唔得人驚。