泛海（129）基本因素瓣瓣掂，橫掃近磅股，遲早係華大（201）翻版。華大對上星期五升咗16%，1年計數，累升88%，再創出沙士以嚟新高，NAV折讓收窄到36%。泛海條件仲吸引：泛海最新NAV0.86元，現價（0.228元）折讓達到73%。連集團手頭百萬方呎土儲及投資物業，秤先啲，NAV去到1蚊，折讓上到77%，泛海平霸。
又隨住泛海售樓收益，喺下半年度入賬，估計集團07年度（3月止）純利上到1.7億銀，平均PE7字頭，近磅股當中，泛海又係平通街。再講，泛海大股東潘政，呢期開始出手，單係呢個月上旬三個交易日內，已經增持咗1220萬股，最平入市價都係講緊0.211元，泛海現價只係升咗8%咁大把。以07年度10倍PE做目標，係咁易都要升30%到0.3元，望住華大NAV折讓走，泛海係要升1.8倍到0.64元。
力華量度目標0.45元
力寶華潤（156）阿仔香港華人（655），喺2月退回一筆基金投資，變現4億銀兼大賺1.9億銀，力華母憑子貴，亦大賺逾億銀，07年度已經有純利墊底。
又力華最新NAV0.55元，估計連埋手頭優質物業，重秤NAV上到0.65元，現價（0.29元）折讓55%，炒折讓一樣冇問題。先喺三角區0.27元至0.33元嚟轉短打，破頂就揸實，博力華上試三角量度目標0.45元，到時，力華NAV折讓仲有30%，安全到爆。