奧斯卡最佳動畫《踢躂小企鵝》，最成功地方係帶你進入企鵝生活，以另一角度看呢個世界。小企鵝提及外星生物，兩隻眼，雙腳站起，有唔少奇形怪狀工具，不正正就是人類嗎？人類喺企鵝家園大量捕捉海魚，破壞生物鏈，企鵝們面臨餓死嘅大危機。呢個時刻，企鵝世界出咗怪胎曼寶，牠與眾不同，誓要與「外星生物」（即人類）打交道，放條生路畀企鵝！
記者：許福合
曼寶不會唱歌 只會跳舞
小企鵝曼寶出生嘅地方係南極，雖然冰天雪地，不過對企鵝簡直小兒科，而呢班企鵝一族，係以唱歌作為身份象徵，唔識唱歌等同窮光蛋一樣，唔會受重視，最重要仲係唔識唱歌，就好難得到女仔歡心！
曼寶出世
雖然曼寶生得活潑可愛，鵝見鵝愛，但在唱歌代表地位嘅世界，卻偏偏天生不會唱歌，經常被其他企鵝取笑。
與老鷹研究外星生物
遇上老鷹雖然有驚，但最後都無險，而曼寶亦從老鷹口中，首次知道外星生物存在，老鷹曾經被活捉研究，並在腳上套上識別環！
被長輩責罰
對於唔識唱歌，卻喜好跳踢躂舞嘅曼寶，老一輩長老們話佢係「破壞傳統，會被神靈責罰，令到魚穫減少。」
曼寶學識游水喇
從學校畢業後，曼寶首次下海，游水游到好似空中花式表演一樣。
死火！差啲俾海象食咗。
企鵝捕捉魚類做食物，同時又係其他生物狩獵目標，經常被襲擊。
認識搞笑小企鵝
偶然之下，曼寶認識列文等小小企鵝，搞出唔少笑話。
癲鵝「大情聖」出場
瘋毛瘋翼企鵝「大情聖」，套個垃圾膠圈，就話自己有神力，可幫人解決問題。
尋找「外星生物」
途中曼寶遇上唔少南極生物，佢哋都話外星生物非常兇惡，接近好危險。
再遇殺人鯨
野生殺人鯨一啲都唔友善，唔似海洋公園嗰啲咁可愛。
外星生物終於飛到企鵝王國，啊，原來係人類。
結局：
套戲結局好簡單，人類知道過份捕捉魚類影響企鵝食物來源，所以要立即禁止全球捕魚，唔想住喺一個無企鵝嘅世界。
星級配音 夠生鬼
無論你欣賞《踢躂小企鵝》係用英文定係中文配音，都可享受到星級配音陣容，英語有妮歌潔曼、伊力查活及羅賓威廉斯等，不過睇動畫都係聽廣東話比較過癮，粵語配音有鄧麗欣、側田、谷德昭等，唔少睇過嘅人都大讚側田配音夠生鬼，令到角色非常人性化，而側田要替一隻五音不全企鵝配音，同佢現實剛好相反。另外谷德昭更厲害，一人聲演4名角色，無將舌頭打結已經好嘢，仲要唱埋歌，睇DVD時就記得要留意。
睇後感
睇完《踢躂小企鵝》後，發現其實係一套諷刺性電影，劇中將人類喻為一種可怕生物，會捉生物去研究，生人勿近，非常兇殘，同時亦係非常貪婪，大量捕捉魚類，令到可愛企鵝嘅食物（魚類）大量不足。
本來以為係好簡單咁講吓曼寶跳舞嘅歷程，但原來背後會帶出呢個道理，喺人類開發資源同時，可能正對其他生物構成嚴重影響，佢哋無法申訴，亦無力反抗，惟有靠人類自發性對環境保護，才能確保生存空間，非一般動畫咁簡單。
