Ella（官恩娜）工作繁忙，行街Shopping時間唔多，所以稍有少少時間，佢都必定跑去一些有齊衫、褲、袋、飾物選購的水貨舖，一次過可以盡掃心頭好。好多明星非貴不買，非名牌不要，Ella就覺得：「我買嘢其實冇乜準則，冇乜邊個牌子特別鍾意，冇話一定要買名牌，總之見到靚就買。香港其實有好多設計師都好有水準，上次幫TDC行咗個Show，見到啲年輕設計師嘅作品好Creative，真係有歎為觀止嘅感覺。所以，俾我揀我會支持本地創作多過歐洲名牌。」好多人買嘢都會擔心呢樣驚嗰樣，買條鏈返去又怕襯唔到見衫、買個袋返去又怕唔襯個Look，總之千機算盡先真係肯仆鎚交易。Ella卻以愛理不理買咗先算的宗旨：「我見靚就買㗎喇！買咗返去就梗有辦法襯㗎啦！今季好興彩藍、鮮艷嘅顏色，同埋一啲Metallic嘅元素，我會主力搜羅呢類嘅袋同飾物。」
記者：許維雅
攝影：陳偉強
MarcJacobs
彩藍色襯粗金鏈皮袋
幾多錢：$13,000
邊度買：銅鑼灣Twist
「我好鍾意買大Size嘅袋，MarcJacobs今季呢個新袋嘅Size啱啱好，款式簡單，今年夏天又好興呢隻藍色，再有埋今季繼續大熱嘅Metallic元素（金色粗鏈），非買不可。」
ChromeHearts烏蠅太陽鏡
幾多錢：$5,800
邊度買：銅鑼灣Twist
「呢副烏蠅鏡真係好靚，金框襯紅茶色鏡夠特別之外，鏡臂用白皮包住夠grand。我有好多太陽眼鏡，但就好少見呢啲款式，見到咁靚，諗都冇諗就帶咗佢返屋企。」
treshei金色閃石ClutchBag
幾多錢：$890
邊度買：中環treshei
「屋企總要有一兩個細細隻嘅ClutchBag傍身，同朋友出街飲嘢帶大袋太論盡。今季會興啲誇張嘅閃石，呢個袋啲閃石大大粒全由人手釘工，好骨子。加埋金色最易配襯，着咩色衫都用到。」
