財務Ｎ約食飯，自不然係到佢嘅飯堂──新鴻基海都飲茶，財務Ｎ在此打躉多年，係人都識，左丁山雖然好耐冇去，侍應聽見話係Ｎ先生訂位，都唔知幾好招呼。
財務Ｎ素來守時，是日突然遲到，而佢嘅辦公室就位於新鴻基中心對面，只有一天橋之隔，一定冇塞車嘅可能，顯然係公事纏身，唔能夠離開辦公室。等多一陣，侍應請左丁山去櫃枱聽Ｎ先生秘書嘅電話，秘書小姐話：「Ｎ先生啱啱開完會，𠵱家先至出門口，好對唔住。」真好禮貌，左丁山以後要多多學習。
財務Ｎ不久駕到，談起生意，源源不絕，為之眉飛色舞，但此餐午飯目的，並非講公事或時事，而係財務Ｎ想知道吓日本近況。適逢肥仔Ｋ回港度假，等四月第一個星期開學，於是搵埋肥仔Ｋ嚟向財務Ｎ滙報，益佢喺海都食番餐好嘅。肥仔Ｋ住在日本大學宿舍，平時晚晚食蘿蔔豆腐青菜，甚少有肉食；最近與留日嘅國際同學，有巴西、智利、保加利亞、菲律賓、馬來西亞等等，一齊到曼谷，由泰國同學帶隊，自曼谷坐巴士到吳哥窟，搭咗十個鐘頭巴士先至到達，辛苦異常。巴士上有歐洲遊客（皆是背囊客）要求下車小解，司機好似唔識聽英文，一於唔睬，架巴士行足七小時先至小休暫停，肥仔Ｋ話：「可以忍尿七小時先至可以參加呢個貧農旅行團！」係嘞，年青人旅行，唔通要坐頭等飛機直航咩！肥仔Ｋ話：「忍尿還算當作練功，但原來泰柬邊境一帶，根本冇柏油路，有十幾哩係黃泥小徑，巴士又唔係新車有最好避震設備嗰種，而係中古車，我哋喺座位拋上拋落，慘過忍尿。」
到咗吳哥窟，因冇導遊講解文化藝術歷史，肥仔Ｋ一行十幾人睇古蹟睇到一頭煙，茫無頭緒。睇英文、日文說明，又覺得太簡單，路上碰到好多日本人，一樣係盲頭烏繩，於是大家到處拍照，以示來此一遊。肥仔Ｋ話：「原來吳哥窟似係冇賭場嘅拉斯維加斯，到處人頭湧湧。柬埔寨人賣紀念品要收美元或泰銖，我哋懵盛盛換咗一啲柬幣，現在成為廢紙！」