由李連杰、劉德華、金城武同徐靜蕾合演嘅電影《投名狀》（前名《刺馬》）𠵱家已經拍到接近尾聲，噚日杰仔同華仔現身上海勝強影視基地進行拍攝，導演陳可辛當然在場。
拍親熱戲尷尬
杰仔喺戲裏面同徐靜蕾有一場親熱戲，李連杰話拍呢場戲嗰陣覺得好尷尬，佢話：「尷尬是肯定的，因為入行27年，未試過有這樣的內心戲，拍打戲對我而言是輕鬆的，其他戲就完全不輕鬆。」至於劉德華同徐靜蕾都有親熱戲，佢就話：「她比我尷尬！」引得現場哄堂大笑。
今次拍《投名狀》，杰仔話最開心係識到劉德華，仲形容對方係人生中最好嘅朋友，佢話：「我覺得跟他的友誼是大過這部戲，我們真是投名狀（編按：「投名狀」乃古代男兒起誓時歃血所立，係忠誠之證，但凡好漢結盟都要交納投名狀）。」華仔就透露其實係由佢主動同李連杰傾偈，佢話：「我信佛多年，也知道李大哥信佛，所以主動向他請教佛家道理，之後大家就越傾越投契。」
為演員改劇本
導演陳可辛被問到跟三位男星合作如何？佢話：「合作得好開心，我不是一個獨裁的導演，我每一日拍的劇本會因應演員狀態而改變，由大家去發揮。」
