淪落意乙嘅意大利班霸祖雲達斯，董事局眼見升班在望，即刻決定揼水7,160萬鎊（約10.8億港元）擴軍，力圖下季再稱霸意甲，大家有好戲睇嘞。
祖記班董事喺早兩日開會，一致通過繼續向球隊揼水，而合共10億幾港元資金，係外界預測嘅1倍，可見祖記野心有幾大。而大股東投資集團IFIL亦承諾繼續增持球會股份，但具體投資幾多錢要到4月先公布，不過相信數目會幾驚人。
祖記高層咁捨得使錢，一來係升班在望，以球會嘅江湖地位，一大筆意甲電視轉播費落梗袋；二來如果將來獲歐聯參賽資格，就更加豬籠入水，所以夏天大手買人只係出吓小財，遲啲大財一嚟就知和味喇！
既然球會來季大搞，保方、查斯古特、甘莫蘭尼斯，就唔使旨意話冇前景要離隊，大可以放心留低喇！不過以3人今季咁嘅表現，後兩者下季有冇正選踢都難講喇！
求大俠亦想讚下擁有祖記嘅阿涅利家族，始終對球隊不離不棄，即使教練廸甘斯備受批評，仍然宣布無限量支持，幾有情有義呀！唔似得一啲球會老細畀少少錢，就亂批評啲教練咁排陣唔啱，咁打法唔得，幾獨裁呀！