愛車之人購得心愛座駕之後，第一件事會做啲乜？梗係幫部車加包圍、換胎軨，將架車扮到有咁型得咁型喇！但你又諗唔諗到會有人反其道而行，唔扮靚架車不特止，反而整到佢鬼五馬六、搞到成隻鬼咁，兼且講緊嘅係身價過百萬一部嘅保時捷喎！
記者：周達之
愛車之人購得心愛座駕之後，第一件事會做啲乜？梗係幫部車加包圍、換胎軨，將架車扮到有咁型得咁型喇！但你又諗唔諗到會有人反其道而行，唔扮靚架車不特止，反而整到佢鬼五馬六、搞到成隻鬼咁，兼且講緊嘅係身價過百萬一部嘅保時捷喎！記者：周達之
不過講真，呢幾部魔鬼保時捷嚴格嚟講一啲都唔嚇人，而且仲相當得意有趣㖭，之所以將部百萬名車搞成咁嘅鬼樣，都只係為慶祝萬聖節啫。呢個咁頂癮嘅活動，其實係由香港保時捷會所主辦，而當晚有成幾十部保時捷參與。一向將愛車當做家庭一分子嘅車主，除咗幫自己搞個嚇人造型之外，亦出盡法寶幫架心愛波子扮到有咁鬼得咁鬼，務求贏得當晚最嚇人波子大獎。
車迷聚腳兼做善事
講起保時捷會，好多人都會以為只係個有錢人附庸風雅嘅俱樂部，但其實保時捷會經常都主辦慈善籌款活動，等一班會員除有機會聚聚腳外，亦可做善事幫助有需要人士，啱啱所提及嘅萬聖節活動其實亦係慈善活動嘅其中一環，去年該會就籌得接近百萬捐助畀願望成真基金、國際美慈組織及中國扶貧基金會等機構。除咗捐錢，幾個月前一班保時捷車主更身體力行，唔止籌得20萬元畀中華基督教會基順學校暨資源中心，仲用波子載住該校一班特殊學生去大埔遊車河，希望帶給不幸一群一點快樂。
揸波子唔值得人羨慕，有善心先至值得人羨慕，各位波子車主如果想寓娛樂於慈善，不妨打個電話（23361316）加入香港保時捷會吖。