孫燕姿自從早前喺埃及拍MV俾當地導遊恐嚇勒索、搞到慌忙走返新加坡之後，佢父母同唱片公司對佢嘅人身安全都特別小心，仲請保鑣24小時貼身保護，點知反而令燕姿愁容滿面。
冇晒私隱
日前燕姿由新加坡飛往台灣宣傳，孫爸爸安排咗兩名保鑣貼身隨行護駕，陪食陪玩陪行街甚至陪住。成日俾兩個陌生人跟住，冇晒私隱，馮仁昭都戥燕姿慘。最弊係佢個性隨和，反而成日擔心保鑣哥哥會肚餓、凍親或者悶親，不時聽到佢講：「來吧，一起吃飯。」或「不要緊，一起進來坐吧。」呢啲客氣說話，講都講到有啲攰。
當眾試食
為確保燕姿安全，唱片公司唔准佢返去之前租住嘅單位，又特別使咗10萬蚊港幣，租住台北國聯飯店，為期20日，搞到燕姿冇得好似以前咁買餸玩煮飯仔，就連搵朋友或者同事返屋企打麻將都唔得，感覺好似坐監咁。
不過啱啱嗰個禮拜三，燕姿同一班同事去咗台北微風廣場嘅超級市場，原來佢趁工作空檔去行街。只見燕姿好似「放監」一樣，入到超市見到鍾意嘅芝士，伸手就攞嚟試食，覺得好味就分畀身邊同事，好似執到金咁開心，真係要歎一句：自由萬歲！
