賭錢，冇甚麼必勝術，亦冇話絕對輸（至於「長賭必輸」呢樣就實在係大部份賭仔經驗之談）；想贏，運氣及靈感缺一不可。運氣就無法解釋，靈感就廣泛啲，但都離唔開心水選擇，以及跟紅頂白兩大範疇。
心水清貼士「掉轉」諗
賭波嚟講，喺呢個資訊氾濫年頭，貼士推介滿天飛，華度知道唔少波友，其實最後落注出擊，都寧願信自己，各界波盤貼士，至多當做參考，同路就當增強一下出擊信心。綜合而言，賭波貼士名家，都係以「燈神」一族，至受歡迎！
諗諗下，喺跟紅頂白方面，賭波「頂白」情況的確較多，相反過大海去賭場玩兩手，就成日見到「跟紅」場面。好似百家樂枱，雖然都有唔少運滯客人，但心理上都會寧願搵啲比較旺嘅賭客跟注，可能係一鋪牌同一場波嘅時間有分別，又或者賭枱上嘅「燈神」，都唔會留得耐啦！
當然，有得揀嘅話，華度都未必願意做其「燈神」，但最近喺呢個投資版主打項目，戰績慘不忍睹。不過，如果波友心水清，呢排將本版貼士「掉轉」諗下，其實又幫到大家㗎喎！今周決定退下來，將主打貼士交畀另一名家賴恩操刀，最終能否成功「反底」係一回事，最緊要都係希望賴恩好似華度咁，走到條幫到大家手嘅「靚路」出嚟！
文：華度