睇勻今周最有心水，都係啱啱喺米蘭打吡戰反勝AC嘅國際米蘭，佢哋呢個禮拜做番意甲「紅盤王」，周日作客阿斯科利肯定做嘢。
筆者唔係馬後炮，上場我好犯本咁買咗朗拿度「首球」，再買埋國米上盤。原因係覺得AC少國米1日時間休息，歐聯又要打到加時先搞掂些路廸，唯一冇份出場嘅就係朗拿度。的而且確，AC下半場已經冇晒力，國米果然把握到機會反勝。
講番場波，我本身對伊巴謙莫域冇乜好感，但無可否認佢呢排真係「弗」；如果唔係佢成日玩鞋底「蹉」波，單刀又要賣弄腳法，國米點止贏AC1球咁少。「伊巴」都有份喺日前曼聯嘅慈善賽上陣，仲有球助攻畀廸奧夫入波㖭。
周日國米作客冇咗廸比亞治奧、加坦奴方坦拿同桑斯恩等經驗戰將嘅阿斯科利，呢個「客勝」一定要追。雖則國米多咗格羅素同達葛治兩件傷兵，近幾場「讓球主客和」又好少贏到兩球，但身為意甲「紅盤王」，順開幾大都再追。再講，國米呢場冇防中用，又要焗住搵貝廸素客串，但貝廸素攻仲勁過守，一於補埋「大」。
文：畢傑