踏入豬年喜事頻頻，42歲的黃家強昨日終承認其27歲日籍太太Makiko上周六（10日）剖腹誕下6磅重麟兒，他更難掩心情興奮，大談湊仔笑料。另一邊廂，雷頌德前晚出席金牌春茗時也大方承認將榮升豬年爸爸，太太所懷的也是男嬰，預產期在8月，看來豬年似乎男丁當旺。
-黃家強愛兒重6磅-
黃家強日籍太太MizuguchiMakiko去年未婚有孕，至7月二人才擺喜酒，近日不斷傳出Makiko誕下麟兒的消息，但遭家強否認。直至昨日他和陳秋霞到商台宣傳新歌《獨角獸》，終承認太太於本月10日替他誕下6磅男嬰。
家強昨日接受訪問時，雖然身形清瘦了不少，面露疲態兼有大眼袋，但卻笑容滿面，提起湊仔經更是滔滔不絕，分享為父之樂，他說：「太太係生咗BB，係仔嚟嘅，有6磅重，都出咗院喇。本來想自然生，但BB比預產期遲咗兩星期，所以一定要開刀。我覺得佢似我囉，𠵱家真係好開心，諗起都會心微笑。BB個名係我同太太一齊諗嘅，聽落日文又得、中文又得，遲啲有感而發，可能作首歌畀佢。」不過他沒有透露兒子的名字。
阿仔請「飲茶」
家強表示有幫忙湊愛兒，他說：「幫手換片、沖涼，但餵人奶就幫唔到喇，所以媽咪比較攰。」這個百厭BB更試過「斟茶」送大禮給他，家強說：「次次換片都唔知點解佢都要射埋啲尿出嚟，仲要射得好高，整濕晒件衫，你話邊有咁多衫畀佢換？」
採訪、攝影：王連連
-雷頌德8月添丁-
現年37歲的雷頌德（Mark）早前秘密跟拍拖三年的模特兒太太梁家玉（Jade）於律師樓簽紙結婚，並於家強太太分娩當日、即上周六在半島酒店舉行自助西餐婚宴。據知當時阿Jade已懷有三個多月的身孕，Mark於婚宴上也將太太懷孕的喜訊告之好友。
準豬爸雷頌德前晚出席金牌唱片公司在數碼港舉行的春茗宴，他直認太太已懷孕，預產期為8月。問他太太現懷有幾多月的身孕，阿Mark說：「幾個月啦，過咗三個月先可以講。」問他是否因太太大肚才急急結婚，他說：「唔關事，一早已經plan好咗，不過老婆仲未見肚。」提及首次做爸爸的心情是否很緊張，他顯得一副事不關己的模樣說：「唔緊張呀。」至於腹中塊肉是仔或女，他即說：「係仔嚟㗎。」問他為何如此快得知性別，Mark說：「𠵱家科技進步，好快知，兩個月就知。」
兒子叫雷明
阿Mark透露已為愛兒改了名字，他說：「改咗啦，叫雷明。」記者問他是否開玩笑，他說：「唔係呀，雷明係我老竇個名嚟㗎，不過佢已經唔喺度。我覺得姓雷得兩個名好聽，一個係雷明，一個係雷頌德，咁雷頌德我𠵱家用緊嘛。」
假若再生如何取名，阿Mark笑說：「所以唔好囉。」問他送甚麼禮物獎勵太太，他竟說：「生到出嚟先算啦。」但其後即改口道：「最緊要健康。」這個準豬爸爸，真識開玩笑。
採訪、攝影：駱華齡、仇志德
