早前「失蹤」的Rosemary母親Julie前晚與女兒同時在中環出現，真性情的Julie坦言仍生女兒氣，她贈女兒八字真言「工作為上、低調拍拖」。記者欲作和事老指母女關係再僵持下去，不怕Rosemary將來結婚產子才回來，Julie聞言生氣地反問：「生咗我一定要湊㗎？」
法國時裝品牌SoniaRykiel置地廣場店前晚重開，請來Rosemary、馬詩慧及郭秀雲等出席盛會。一身運動裝配低胸背心的Rosemary忙於在三樓時裝店與朋友social之際，記者忽然發現早前「失蹤」的Rosemary母親Julie獨自在樓下出現，記者即時追落樓與一身皮草兼珠光寶氣的Julie傾談，記者指Julie不在港一段時間，大家都很掛念她。
自由變豉油
早前Rosemary及其父都說找不到Julie，十分擔心，Julie聞言說：「我去咗三個禮拜日本同夏威夷旅行啫，乜自己去旅行唔得嘅咩？佢（指女兒）夠自己去澳洲過情人節啦。」Julie滿腹牢騷續說：「佢自己都大啦，佢有豉油（自由）我都有豉油（自由）。」記者問她出走三星期令家人擔心，是否刻意做反面教材給女兒看？Julie說：「唔好咁講，人哋唔想你理咁多咪唔理囉，我冇自把自為，咪唔同佢講咁多囉。」
記者再一次告之Julie她不在港時，Rosemary表現擔心，更差點哭出來，Julie不領情說：「佢識喊我都可以喊，我係happytocry。」是否不喜歡女兒與Christopher復合?Julie說：「冇，我淨係覺得做嘢還做嘢，你問吓佢拍拖點做嘢吖？我係嬲佢，唔關個男人事。我畀個八字真言佢，工作為上，低調拍拖。」記者欲作和事老，叫Julie到三樓與女兒合照，她卻說：「我未嬲完呀，我淨係希望佢專心工作。」記者指Rosemary已澄清和Christopher分手，Julie說：「咁咪最好囉，冇拍拖又一齊去澳洲？」
認唔夠大方
兩母女哪有隔夜仇，再僵持下去女兒結婚生仔回來見她，豈不是更弊？Julie說：「你想我死呀？喂，生咗我一定要湊㗎？」記者指她仍然嬲女兒，好像有欠大方，她說：「係呀，我係唔大方，不過我真性情！」
採訪、攝影：RitaLeung
