聽晚熱刺喺主場迎戰護級球隊屈福特，雖然話主隊現階段要3線發展，不過為咗力爭下季參加歐洲賽資格，今場波3分都係志在必得，何況兩軍實力懸殊，1.4倍單W同埋2.2倍「主勝」吼得過之外，1.8倍「大」更加抵玩！賴恩
要數近期英超最強攻力球隊，唔係曼聯，亦唔係車路士或者阿仙奴，而係近期銳不可擋嘅熱刺，唔計上周英足盃同車路士3:3大手交易場波，單數近3場聯賽就攻入10球，平均每場有3.3球進賬，淨睇呢個數字已經唔需要再考慮對手嘅入球，都夠開入球「大」！
羅比堅尼復出必搏
至於今場作客嘅屈福特，對親強隊都冇好下場，好似近4場對前4球隊全敗兼共失13球，雖然話佢地首輪對熱刺互交白卷，不過值得一提係季初熱刺未上力，前線嘅貝碧托夫、羅比堅尼同埋廸科爾啲低迷情況同今日大勇態狀有天壤之別，所以當日賽果唔能夠套用喺今場比賽。
雖然話熱刺下星期一嘅英足盃要同車路士重賽，而且周中又同布拉加嘅歐協盃大戰完畢，球員體能未必能夠及時恢復，又或者領隊祖爾想留力應付車路士，不過以熱刺班底，加上又要爭來季參加歐洲賽資格，今場波亦唔敢話將前線「3人組」全部收起，何況炙手可熱嘅羅比堅尼上輪聯賽坐波監無得出，今次猛虎出柙對屈福特，以佢好勝嘅性格一定搏盡，熱刺單W得嗰1.4倍，真係吼1.8倍「大」仲化算。
冷選可吼亞琛半場W
冷選方面，筆者就推介德甲球隊亞琛，近5場聯賽不敗兼錄得3勝2和嘅亞琛，近況發揮理想，就連拜仁慕尼黑都要向佢俯首稱臣，所以今次主場對住尾2位置嘅比勒費爾德，主隊贏波有1.95倍博得過！如果仲想博啲，不妨考慮埋亞琛嘅「半場主客和」2.7倍「主勝」都可以一試，因為亞琛入球嘅「黃金時段」通常都出現喺上半場20至35分鐘，所以半勝開出機會都好大。
投資特攻隊金句
「屈福特𠵱家排聯賽榜尾2，場場都要焗攻搶分，不過佢哋攻力弱又守唔穩，以熱刺近期強勢，半力夠炒對手。」