尤太：Hi！成議員，你咪好鍾意搞環保嘅，真係要幫吓我哋屋苑爭取吓，快啲搞掂個樓層分類啦！
成議員：有咩幫到手啊？講環保，我義不容辭，大家出分力救救地球嘛，幾時都要做㗎啦！不過尤太你住嗰度係居屋，裝樓層分類唔係由業主立案法團搞掂㗎咩？有乜嘢難題啊？
尤太：我都以為法團畀錢就搞掂，你知啦，我一家四口，日日都唔少垃圾，如果層層樓都有分類垃圾桶，咁就唔使我日日行落樓去掉落喺地下嘅三色桶啦！為咗呢樣嘢，我先喺幾個月前特登去開業主大會，投票支持裝分類垃圾桶，點知搞極都未掂！
成議員：咪住，咁你法團又肯做，業主投票又支持，𠵱家仲未做得成有乜嘢同官府有關啊？係咪你個法團做唔到嘢咋！
尤太：梗唔係啦，我哋個法團都唔知幾同我哋小業主諗，就係環保署阻頭阻勢，先至搞咁耐都無聲氣咋。原底法團都諗住業主同意就使幾十萬買分類垃圾桶，點知環保署話有個資助計劃，凡係屋苑裝樓層分類桶都有政府補貼，咁有着數又冇理由唔攞㗎，點知一攞就出事。
成議員：出咩事呢？人哋畀錢你買嘢都唔高興？
尤太：咪又係官僚囉，環保署話就係搞環保，但班官就無心幫小市民。好似呢個資助計劃開頭就話淨係資助二成，後嚟又話資助到五成，改嚟改去唔緊要啦，佢哋又要屋苑一次過裝晒十幾幢樓先有得資助，咁屋苑管理好多時都係一幢幢咁慢慢試新嘢，但環保署就死板到唔轉彎，係都要一次過，咁就要使幾十萬買桶，又要開大會，搞足幾個月。好啦，等到屋苑乜都通過晒，環保署又話唔買得住，要等佢哋開會通過先得，點知一等又幾個月，前前後後成年都未可以開始搞。你話呢個係幾咁支持環保嘅環保署啊？
※ ※ ※ ※ 成功爭取 ※ ※ ※ ※
成議員曾經喺呢度批評康文署官僚，有街坊想租沙灘做婚禮場，但康文署嘅申請手續唔清楚，負責人又無彈性，但經呢度講吓，街坊反映嘅南區康文署即刻有所改善，又一項成功爭取喇！
《街坊Hi你》歡迎讀者及各界社會人士分享地區事務個案，本欄將盡力向有關政府部門跟進。
聯絡電郵︰[email protected]