好多人對辦公室戀情免得過就免，有都最好唔畀人知，費事成為同事茶餘飯後笑柄，不過，若果你係中電員工就冇得收埋，因為分分鐘要向上司申報！咁離譜？
中電香港輸電及供電業務部總監潘偉賢同華華解畫，只係同中電有商業關係嘅先要申報啫，唔係乜嘢戀情都要申報咁嚴重。
點為之同中電有商業關係？佢話主要係中電嘅同事同供應商嘅員工結婚，為免有利益衝突，公司先會硬性規定上報，並盡量安排兩人唔喺工作上有接觸。佢特別強調，同事間嘅戀情就唔需要申報嘅。
潘偉賢又話，可能工作性質嘅關係，傳統上中電嘅男女員工比例大約係9比1，近年就好咗啲，請咗唔少女工程師，比例升到8比2。先排咪有調查話香港女多男少，搞到好多適婚女性搵唔到伴嘅，啲女士不如入中電做，可能有意想不到嘅「發展」呢！
[email protected]