AC米蘭前鋒基拿甸奴，周二就現身指證曾勒索過佢嘅狗仔隊，據估計，涉及呢壇嘢嘅受害人名單，將好似雪球一樣越滾越大！
「基奴」去年10月被一名叫哥朗拿（Corona）嘅狗仔隊成員，拍到同少婦喺舞廳跳舞，事後嗰輯相片被索價6,000歐元（約6萬港元），否則就「報紙見」！當時，「基奴」乖乖畀錢，直至事件遭揭發，先知哥朗拿曾用同一方法勒索過AC會長貝盧斯科尼個女、托廸、查斯古特等各界知名人士。
「基奴」大義凜然做證人固然抵讚，但我求大俠扮吓神探福爾摩斯推理，假如啲相只係「同少婦跳舞」咁簡單，值唔值6萬蚊呢？抑或該女士係已婚之婦，「基奴」為保該女清白，而迫不得已「科水」呢？定係……
奧利華拉親姊被綁獲釋
同日AC陣營亦傳出好消息，就係前鋒奧利華拉嘅37歲家姐瑪莉亞，喺巴西被綁票5個多月後，終於奇迹被放走！去年10月，瑪莉亞俾兩名武裝綁匪闖入住所，劫走咗足足160日，以佢勒索奧利華拉，佢喺冇畀贖金下「健康」離開，算係不幸中嘅大幸！