上周唔好意思，推介大家捧西甲「黑盤王」塔拉戈納對家西維爾，結果堂堂西甲榜首西維爾，都可以作客輸0:1，塔拉戈納連贏3次盤後，亦擺脫西甲黑盤王「污名」，由馬略卡取而代之。
馬略卡呢支小島球會近季越打越沉，已經係不爭事實；上仗作客對住同屬護級嘅皇家蘇斯達，竟然可以被對手大炒3:1，皇蘇攻力係西甲最差，馬略卡都可以失3粒，後防真係要反醒吓。今次馬略卡回師主場，原本都可以看高半線，不過好衰唔衰，對住大勇嘅貝廸斯，要搶分真係唔易。
搵戰友畢傑幫我check一check貝廸斯盤路，原來「靚仔」到不得了，近8場盤路係6贏1走1輸，上仗主場迫和薩拉戈薩，平手盤走盤，都無話可說，而貝廸斯作客盤路亦醒神，已經連贏3口，作客皇馬都可以保住唔輸，今次開出平手盤，馬略卡何得何能贏到佢，捧貝廸斯啦！
另外，德甲黑盤王漢堡，之前連贏4口盤後，上仗終於「獲利回吐」，主場被利華古遜迫和0:0；講真嗰場波漢堡只讓平/半，兼且冇飛落，已經唔對辦；今次作客漢諾威，開出平手盤，亦都有輸盤危機，話晒漢諾威上仗對榜首史浩克04都唔使輸。漢堡盤路有長輸長贏路，今次可以再追佢輸多一次㗎。文：牽牛