現時唔少汽車公司都已經有一套極完善嘅檢查及維修制度，更有各種先進器材嚟輔助檢測，令到維修工作事半功倍，但亦正正因為咁，日子一久，會好易令人養成依賴嘅習慣，甚至會迷信器材。
記者：周達之
從事汽車維修30多年，現時任職萬事得修理部工場主任嘅李先生，亦係因為公司嘅制度同器材太完善，令自己一度跌入迷信器材嘅陷阱。事緣有次李先生接手維修一架Mazda929，據車主表示，架車嘅四輪轉向系統警號燈有時會亮起，不過李先生用檢測器材左Check右Check，最後都發現唔到有問題，但奇怪嘅係車主明確表示曾經見過盞警號燈着過，事件的確考起呢位老師傅，而同其他同事討論嘅時候，好多人都認為係車主睇錯，因為電腦唔會有錯，Check過無問題就應該係無問題。
靈機一觸搵出禍端
不過李先生並唔係咁諗，於是聯絡車主，經過一輪交談後，靈機一觸，馬上跑回維修部用花灑將部929照頭淋，而警號燈果然馬上亮起！原來成件事係因為車主自己搵人加裝咗部防盜系統，但可惜手工麻麻，結果搞到落雨時會令電線短路，而萬事得喺檢查嘅時候都係喺亁燥嘅環境底下進行，令到部車能夠逃過檢查系統嘅嚴密檢測。
盡信書不如無書，無論電腦點先進都好，始終都只會按照既定程式辦事，要靈活處理所有變數，始終要靠懂得應變嘅人腦，而呢件事亦提醒咗李先生做人要曉變通、唔可以盲目信電腦嘅道理。各位讀者，你哋睇完呢個故事之後又會否有所領悟呢？