呢排證券界嘅頒獎活動一個接一個，噚日晨星亞洲公布年度最佳基金經理大獎，全場焦點落喺亞洲股票最佳基金經理得主──霸菱國際傘子基金－香港中國基金身上，因為呢個基金去年嘅回報率高達94.65%，全場贏晒，比同類嘅大中華股票組別平均56.88%回報，高出66%。
代表霸菱領獎嘅霸菱資產管理董事陳裕雄，仲唔介意公開佢哋嘅投資心得。佢話要做到好成績，勤力見上市公司管理層係基本功，負責嘅三四個同事要同二三百家中港上市公司保持緊密聯繫，平均一年開五百次會議，出差期間一日最多要見七家上市公司管理層，直情鐵人一樣！
佢又話唔隨波逐流，先至可以贏同行，「人人驚時能把持得住（唔沽貨），市場瘋狂時要忍住唔追貨」；另外就係主動發掘龍頭股嘅明日之星，呢啲股嘅升值潛力至夠大，所以唔會淨喺買恒指成份股咁行貨。
睇好內地消費基建地產
𠵱家個市咁波動，散戶點算好？陳裕雄話只要唔撞正911、「沙士」等大災難，大市仍處上升軌，大家可以揀實力股，當然期間難免要承受一定嘅波動；而今年佢睇好內地嘅消費、基建同地產股等。
[email protected]