中電業績唔係太突出，勢估唔到一班董事可以大幅加人工，董事局建議，大股東兼主席嘉道理，袍金加過半至43萬，副主席毛嘉達都唔弱，加至34萬，加幅相若，非執董一律加五成半至31萬！
公司解釋，大加袍金，主要因為非執董工作量，近年確有顯著增加嘅趨勢，例如董事要應付中電業務嘅增長，同埋更嚴格嘅規管要求。中電話，其實佢哋釐定袍金，經已採納較保守嘅方案，亦參考咗同業嘅薪酬水平。
淨係空口講白話係無用嘅，中電喺年報度重白紙黑字寫明，05年度各董事總會議時數維持40小時，審議文件頁數亦保持約1500頁。但係到咗06年，會議時數即爆升逾50%到逾60小時，審議文件亦勁增逾66%到2500頁！莫非咁即係話加薪有理？
華華對電力市場08年後改革都略有所聞，好多中電高層都同華華講過，因為呢次改革，真係多咗好多嘢要搞，但真係估唔到會多成咁。家陣各行各業都興用可加可減機制，若果他朝搞掂後，工作量減少咗，中電董事又會唔會減番人工呢？
阮太年薪破千萬
講開又講，其實嘉道理同毛嘉達加幾多人工都唔重要，因為佢哋主要收入係嚟自每年數十億嘅股息！要數中電嘅打工皇帝，梗係要數首席執行官包立賢啦！佢06年總人工有成1390萬，但只係加咗8個巴仙咁大把。
至於中電成立一百年，首位女性常務董事阮蘇少湄，佢舊年嘅年薪亦突破1030萬，應該可以再成為中電另一個第一，即係中電首位年薪過千萬嘅女性。中電財爺、集團財務總裁謝伯榮，06年亦加薪6個巴仙至980萬銀，今年應該可以突破千萬矣。
[email protected]